3823/2023-2024

Aizawl, the 14th February, 2024: Vawiin chawhnu dar 1:00 khan Sports & Youth Services (SYS) Minister Pu Lalnghinglova Hmar chuan Valentine’s Day puala Association for Voluntary Blood Donation (AVBD), Mizoram State AIDS Control Society (MSACS), Blood Center - Civil Hospital, Aizawl leh Music Domain Mizoram (MDM) tangkawpte buatsaih thisen pek runpui, ‘Valentine’s Day Blood Donation Camp' chu Dawrpui Multipurpose Hall-ah a hmanpui. He hunah hian SYS Minister hovin a mamawh apiangte hman turin thisen pek a ni.

He hun hmanpuitu Sports & Youth Services Minister Pu Lalnghinglova Hmar chuan midang tana rawngbawlna leh malsawmna a ni tih hriaa phut let nei miah lova thisen pe ngam tam tak Valentine's Day pual Voluntary Blood Donation Camp huaihawta an tel thei chu ropui a tih thu a sawi a. Ram changkang apiangin thisen pek an uar thu sawiin, khawvela thisen pek za zela 40 chu khawvel ram hausa leh changkang an nih thu leh, a petute hi khawvela mihring awm zat atanga chhuta za zela 16 chauh an nih phak thu a tarlang a. Thisen pek chu changkanna leh hmasawnna intihhmuh tur chi tak a nih thu sawiin, thisen pek runpui bultantu leh chhawmnung zeltu bakah senso tumtute thahnemngaihna fakawm a ti a. Thisen pek chu thil inchhirawm loh tak a nih thu leh pek theih loh hun awm thei a nih avangin thisen pe theite chu hun remchang an neih mek bawhpelh lova thisen pek chhunzawm zel tum turin a fuih a ni. 

Pu Lalnghinglova Hmar chuan thisen pek ngai lova a pe theitu nih chu dinhmun duhawm leh ropui a nih thu leh, thisen pek chu thil hlauhawm a nih loh thu sawiin, thalaite chu an thatlai hun chhunga a tam thei ang ber thisen pek hman  tum turin a sawm a. Mizorama thisen pe hnem ber Tv C. Lalremruata inpekna entawntlak a tih thu sawiin, thalaite chu midang tana rawngbawlna a ni tih hriaa thisen pek uar deuh deuh turin a fuih a. Mihring nunna chhan nana pawl din Association for Voluntary Blood Donation-te hmalakna chu ropui a tih thu sawiin, an kalzelna turah duhsakna a hlan a. Kum tina her chhuak thin February ni 14, Valentine's Day chu tunge a ni tih pawh hriat lohte chunga hmangaihna lantir nana hman a ni thin chu ropui tiin, chin dan mawi tak leh midang tana malsawmna ni bawk chu chawinun zel a pawimawh thu a sawi bawk.

Vawiin voluntary blood donation camp puala inkhawm tawi buatsaih hi Dr. Zoramdinthara, Vice President, AVBD Gen. Hqrs. Mizoram chuan kaihruaiin General Secretary Pu Lalrinkima'n report a pe a. HDFC Bank Ltd. hnenah voluntary blood donation camp 2024 buatsaih kawnga an hmalakna avangin chawimawina thuziak SYS Minister-in a hlan a. AVBD Gen. Hqrs. President Pu C. Lalnunnema'n lawmthu sawiin hun hman a khar a ni. Dawrpui Multipurpose Hall-ah hian a mamawh apiangte hman turin thisen pek runpui nilenga kalpui niin, blood donation camp hlawhtling tak neih a ni.

Valentine's Day pual thisen pek runpui hi kum 2010 khan Pi Chuauzikpuii'n thian thate sawmin Civil Hospital Aizawl Blood Bank-ah buatsaihin bul a tan a. Thupui atan "Show Love, Give Blood" tih chu hman niin thalai tam takte'n an hmangaihte puala thisen pein midangte tan malsawmna an lo nih phah ta a ni. Kum 2011 atangin AVBD General Headquarters nen tangdunin buatsaih chhunzawm zel a ni ta a, kum 2013 atangin  District 4 (Aizawl, Lunglei, Serchhip, Lawngtlai) ahte he programme hi buatsaih a ni a. Kum 2014 ah khatih hun laia District awm zawng zawng (8) ahte AVBD leh Blood Bank tangkawpin he programme hi buatsaih a ni a, kum 2020, 2022 leh 2023 ah phei chuan Blood Bank awmna zawng zawngah thisen pek runpui hi hman a lo ni ta a ni.

He programme hi MSACS, NHM, Civil Hospital  RKS, Bank leh mithahnemngaite'n an sponsor tlangpui a. A bul tan tirh 2010 khan Unit 146 pea bultan niin nikum 2023 khan Unit 1113 pek a ni a, kum 2010-2023 chhunga Valentine's Day programme bika thisen pek tawh zat hi Unit 9853 a tling a ni.

AVBD Mizoram chuan thalaite chu damlo thisen mamawhte tana thisen pek uar chhunzawm zel tur leh kum khat chhungin tum 2/3 tal thisen pek theuh tum turin a sawm a. Thisen pek chu mahni hriselna inchikna free medical check-up a nih pah thu tarlangin, thisen pe ngam ngei nupui pasal atana thlan nachang hre thar theuh turin thalaite a chah a. Hmangaihna lantirin a mamawh apiangte hman tur thisen pek chhunzawm zel turin AVBD Mizoram chuan thalaite a sawm a ni.