3256/2022-2023

Champhai, the 13th January, 2023: Vawiin chawhnu dar 1 khan DC Conference Hall, Champhaiah Dr. Lalrozama IAS, Secretary, Sports and Youth Services, Government of Mizoram kaihhruaiin Sports chawikan zel nana hmalak tulte sawiho a ni.

Sports & Youth Services Secretary Dr. Lalrozama chuan District Bawrhsap hmalaknaa District chhunga Sports tihhmasawn kawnga tulte sawia inrawnkhawmna hun buatsaih a ni chu lawmawm a tih thu a sawi a. Sports tihhmasawn zel nan lungrual taka hmalak tlan a pawimawh thu sawiin, inkaihhruaina duante chu a tul ang zela that tlanna tur tinzawna ennawn leh siam rem zel theih anih thu a sawi a. Sports chawikan nan hun khawhral hman anih loh thu leh infiammite hmakhua ngaia hun tha an neih chhunga an tana tha ber tur lam hawia ngaihtuahna sen tlan a tul thu sawiin, infiamna hmangin eizawnna, hriselna, inpumkhatna leh thawhhona tha a siam theih a, mihring nuna bet tel tlat anih avangin tih hmasawn zelna turin hun tha kan bawhpelh thiang lo a ni, a ti bawk.

District Bawrhsap Pu James Lalrinchhana pawhin thu sawiin, Champhai District-ah Sawrkarin a pawmpui Sports Association 30 a awm thu leh District Sports Committee din anih theih nana hmalakna a sawifiah a. Sports infrastructure tihhmasawn nan project hrang hrangte siama thehluh anih thu sawiin, infiamna hmangin thalai hrisel zawk, ruihhlo laka fihlim leh chhawrtlak chherchhuah kawnga tanlak tum anih thu a sawi bawk.

Thukhawm chuan Champhai District chhunga Sports tihchangtluna chawisan anih theihna tura pawimawh hrang hrangte an sawiho a. Sawrkar thuchhuah anga District Sports Committee (DSC) mumal tak dina, anihna ang tur taka kalpui anih theih nana hmalak chhunzawm zel kawnga tulte an sawiho bawk a ni.

He hunah hian District Sports & Youth Officer, Champhai bakah District Sports Committee ruangam Sawrkarin a duana member  Department hrang hrang atanga Official-te an tel a ni.