3255/2022-2023

13.1.2023: Vawiin khan Tuivai leh Tuiruang infinna hmunah Ruonglevaisuo Unau Suopui Kut 2023 neih a ni a. Tourism Minister Pu Robert Romawia Royte chuan khuallian niin a hmanpui a, Ruonglevaisuo Lungphun a hawng nghal bawk a ni.

He inpumkhatna Kutpui ni 3 awh tur hi nimin January ni 12, 2023 khan Manipur Governor-in Parbung, Manipurah a hawng a, Ruonglevaisuo hmuna an pipute lo cheng tawh thin Zo chi peng tam tak Assam, Mizoram, Manipur leh Tripura atangin an kalkhawm a ni.

Vawiin kut lawmna ah hian Tourism Minister Pu Robert Romawia Royte chuan hmanlai huna Tuivai leh Tuiruang infinna (Ruonglevaisuo)-a lo cheng thinten a hmun ngeia Kutpui an hmangho chu ropui a tih thu sawiin mahni sum tam tak senga huaihawttute an fakawm a tih thu a sawi a, hun lo kal leh zel atan Mizoram sorkarin tanpui an tum tur thu a sawi bawk a ni.

Tourism Minister Pu Robert Romawia Royte chuan Mizoram Sorkar chu khawvel Zofate ta, Zofa zawng zawngte tana ding a nih thu a sawi a. Mizo nationalism chu India state ramri leh international ramri ten an dang thei lo, Zofate awmna zawng zawng a thleng vek a ni a ti. Mizoramin harsatna kan tawh laia Manipur unauten min tanpuina te avangin lawmthu a sawi a, a tul ang zelin intanpui zel ang u a ti.

Minister Pu Roberta chuan Transport Minister Pu TJ Lalnuntluanga hmalaknain Tuiruang lui zawh tur hian Inland Waterways siam tura survey tan mai tur a ni a, Tipaimukh bial leh Zoram hmar bial pawh a zarzo tur in ni a ti a, Tuivai Lei dawh thuai a nih theih nan Mizoram sorkarin hma a lak mek thu a sawi bawk.

He hunah hian MLA Pu H.Biakzaua, MZP Gen Hqrs President Pu Lalnunmawia Pautu leh Dr L.Fimate Chairman, Organising Committee bakah mi pawimawh dangten thu an sawi a. Zo chi peng hrang hrangte zai leh lam a ropuiin mipui chhimtu an tam hle a ni.