189/2023-2024

Aizawl, 22^nd April 2023: Vawiin khan Sialkal Range Development Council (SRDC) huamchhunga pawl 9 leh pawl 11 topper zirlai sawmpathum(13) New Delhi-a kal turte pualin SRDC Cell Office Venghluiah hun hman a ni a. He hun hi SRDC Chairman, Lengteng bialtu MLA ni bawk Dr. L. Thangmawia chuan a hmanpui a. He hunah hian Dr. L. Thangmawia chuan SRDC fund-te chu zirna atan awmze neia hman chhoh mek zel an ni,a ti a. Excursion a kal tur zirlaite chu taimakna leh tumruhna thar nei tura a  fuihin, cheng 2000 theuh a pai nghal bawk.

Dr. L. Thangmawia chuan SRDC meeting-in a lo rel tawh angin kum 2019 April thla khan zirlaite tan excursion hi lo neih a nih tawh thu a tarlang a, Covid hripui leng vanga chhunzawm theih a nih loh hnuah excursion neih a ni leh tur chu a lawmawm hle a ni, a ti bawk. Excursion chuan zirlaite khawhawi tizau se a duhsak thu sawiin, zirlaite chu line hrang hranga mi hlawhtling an nih theih nan he excursion hi rahbi pawimawha hmang turin a chah nghal bawk. SRDC Chairman chuan kumin HSLC leh HSSLC exam-a SRDC area huamchhung zirna in atanga Distinction-a pass te chu smartphone leh laptop pek an nih tur thu leh SRDC area zirlaite tana sak Luangmuala Paite Tribal Girls’ Hostel pawh luah theih thuai anih a beisei thu a sawi bawk a ni.

Dr. L.Thangmawia chuan a bik taka zirna lam ngaihtuahtu tur ‘Hostel & Education Committee’ chu SRDC hnuaiah kum 2020 March thla khan din a nih thu sawiin he committee kaltlang hian hma tam tak lak a nih thu te, SRDC area huamchhunga zirtirtu indaihlohnate chu SRDC Fund hmanga zirtirtu rawihsak an nih thin thu te, New Delhi-a Civil Service Coaching kal zirlai pahnih cheng nuai chuang ve ve a sponsor an nih tawh thu te, NDA interview hmachhawn tur zirlai pakhat cheng nuai chuang a sponsor a nih tawh thu te bakah zirlai thiamthei, chhungkaw harsa zirlai sawmli(40) chuang SRDC in tanpuina a pek tawh thu te, zirlai 3 technician zir mek a sponsor thu leh Fashion Designing zirlai 3 a sponsor mek thu a sawi a. Mimbung HSS, Kawlbem HSS, Hrianghmun HS leh Vaikhawtlang HS te pawh SRDC in cheng nuai tel a a tanpui vek tawh thu te, zirna atana SRDC-in nasa taka ke a pen mek thu sawiin zirlaite tan nasa zawk-a ke pen zel a tum thu  a sawi bawk a ni.

SRDC hmalak mekna dang te pawh tarlangin Dr. L. Thangmawia chuan faina lamah pawh hmalak tan niin kumin 2023 hian fai inelna SRDC area huamchhung khua leh Institution te tan buatsaih a ni dawn a, lawmman tha tak siam a ni dawn a ni, a ti a. Literature leh Culture lam a hmala turin ‘Cultural & Literature Committee’ chu SRDC hnuaiah din fel a nih tawh thu te, SRDC area huamchhunga Rangva inchung la nei lote kumin chhunga neih tir vek tura hmalak mek a nih thu te sawiin, SRDC hmalakna hrang hrang ah area mipuite tawiawmna leh fuihna an dawn avangin lawmthu a sawi bawk a ni.

He hun hi Pu Lalrinawma Khiangte MCS, Development Officer, SRDC in a kaihruai a, zirlaite chu an thiamna vanga Delhi kal theia an awm chu a lawmpui thu leh chhuanawm a tih thu hrilhin, excursion chhunga an hriattur thil pawimawh hrang hrangte hrilhfiahna hun a hmang bawk. He hunah hian Pu F.Lalnunmawia, Consultant SRDC leh official dang te an tel bawk a ni.

SRDC area-ah hian khaw paruk – Lengteng AC bial chhung khaw pali Mimbung, Hrianghmun, Teikhang, Kawlbem leh Champhai North AC bial khaw pahnih Vaikhawtlang leh Selam te an awm a, Mimbung chu SRDC Headquarters thuthmun a ni.