Nimin(ni 13.10.2014) chawhnu khan New Secretariat Conference Hall-ah Mizoram SSA leh YMA te chuan sikul naupangten hunthawl awmze neia an hman theihna turin zirtirna pek kawngah thawhhona thuthlung an ziaka. He hunah hian School Education Minister Pu H.Rohluna, Parliamentary Secretary Pu Joseph Lalhimpuia, Education department hotute leh CYMA hruaitu te an tel a ni. He thawh hona Thuthhmg hi April ni 1, 2014 atanga March ni 31, 2015 thleng atana ruahman phawt a ni.

He thawhhona ah hian zirna tih hmasawnna kawngah YMA branch hrang hrang ten SSA leh Education Department hmalakna an tawiawm mai bakah a theih ang ang in hnam ziarang pawimawh hrang hrang a remchan danin an tlai hunawlah zirlai naupangte an zirtir thin ang.

He huna thusawitu, PuH. Rohluna, School Education Minister chuan YMA leh Sawrkar chu hlawhtling taka an lo thawhho thin tawh thu sawiin hmasawn zel erawh a ngaih thu a sawi a. Beiseina thar nen rilru inhmu taka zirna tihhmasawn nan thatak a an thawh ho a duh thu a sawi a ni. School Education Minister chuan thuthlung han ziah a awlsam angin hlawhtlinna hmuh a awlsam lova, harsatna tam tak taihmakna leh tumruhna nena paltlang a ngai thin a ni a ti a. Department pawh a kalfuh tawkloh na chin ah a ngaihna hria leh remhria ten an finchhuah kan ngai thin dawn a ni a ti.

Pu Rohluna chuan Eduation lama hmachhawp thar te tarlangin zirlai ti tha te hnena lawman an pek thin Cash award chu kumtina mumal taka kal pui a nih tur thu sawiin HSCL Topper leh HSSLC (Subject Stream 4) a topper te hnenah Chief Minister award Rs. 50000 leh Citation hlan an nih tur thu a sawi a, National School Games a lawm man la te hnena pawisa an hlan thin (Sport Incentive Cash Award) Gold- Rs. 3000, Silver 2000 leh Bronze-1000 ni thin pawh Rs.5000, Rs 3000 leh Rs.2000ah tih pun a ni a. Kumin National School Games-ah Hokey under - 14 Girls, Football under-14 boys & Girls, Taekwando Boys & Girls, Volleyball- boys, Judo Boys & Girls-ah te Mizoram a tel a ve ang a ti.

Programme kaihruaitu, Pu Joseph Lalhimpuia, Parliamentary Secretary chuan YMA te nena thawhhona tha tak an nei thei chu lawmawm a tih thu sawiin, kumin chhung hian Mizoram a School zawng zawng te chu mapping mek a nih thu leh 95% zawh tawh a nih tawh thu a sawi a. December thla ah chuan Google atanga Mizoram School awmna te leh School dinhmun hmuh mai theih a nih tur thu la sawi. Faina chung changah school zawng zawngah hma lak vek turn a ni. Hemi atan hian sumdawng pawlte pawh thawh pui ah sawmin, YMA te leh Pawl hrang hrang te pawh thawhho pui tur a ruahmanna siam anih thu a sawi a ni.

He hun a thusawi tu dang Central YMA President Pu Lalbiakzuala chuan kan hnam hma sawnna tur pawimawh tak pakhat chu zirna hi a ni a, YMA-in kura puan ah pawh an lo puan tawh thu leh ziak leh chhiar lama hmasawnna atana hma nasa tak a an lo lak thin thu a sawi bawk.

SSA leh YMA thawhhona thluthlung hi Pu R. Vanlalvena I.A.S. Secretary, School Education Department leh Central YMA President Pu Lalbiakzuala ten an ziak a ni.