Vawiin khan SSA Lunglei District buatsaihin Eitur tha chung chang inzirtirna thla Rashtriya Poshan Maah 2019 pualin Baptist Higher Secondary School Junoir Section Serkawnah hun hman a ni.

He hun hi Lunglei SSA, DPC Pu Micky R. Lalenkawla'n a kaihruai a,  khuallian Lunglei Division Horticulture Officer Pu L. Lalhmingmawia chuan zirlaiten lehkha tha taka an zir bakah eitur tha an ei a pawimawh thu sawiin thlai leh theia chakna awmte chu chaw tha ber annih anga ei hmawmsawm dang aia ei uar zawk turin a chah a, sikul huana chin tur tomato leh thlai dangte a tul anga pek chhuah zel an tum thu a sawi bawk a ni.

Vawiin a National Nutrition Month puala hun hmanah hian Lunglei District Level Convergence Committee on School Nutrition Garden hmalaknain Lunglei District chhunga sawrkar school 20 thlanchhuahte hnenah Horticulture Department atangin sikul huana chin tur Dragon fruit bul 10 theuh hlan an ni bawk.

National Nutrition Month puala hun hmanah hian zirlai naupang ten hriselna leh eitur thianghlim pawimawhna chung chang ziak kengin Serkawn khawchhungah kawng an zawh nghal a ni.