SSA Uniform chungchangah State Project Office SSA Mission chuan a hnuaia ami ang hian thuchhuah an siam.

School Uniform semna tur cheng nuai 743.156 hman lohin a luangral a, cheng nuai 589.624 pawh la hman lohin a awm tih chungchangah thil awm dan chu hetiang hi a ni e. Cheng nuai 743.146 hi a hun chhunga hman theih loh khawpin a lo thleng tlai a. Amaherawhchu, Mizoram tana hman theih loh tura kir leh a ni lova, a kum chhung 2010-2011 chhungah hian a hman theih loh a ni ringawt a. Central atanga sum lokal Lapse kan lo hmelhriat ang, hman theih loh tura kir leh nghal a ni lova, hman zui theih turin a kum leh 2011-2012 Opening Balance-ah a lut nghal vek zawk a ni.

Mizoram SSA Mission chuan kum 2010-2011 Budget pangngai bakah Supplementary Budget for Right to Education chu kum 2010 chawhnu lamah buatsaih a ni a. Free Uniform leh thil thar dang tam tak kum hma lama la awm ngai lo pawh hetah hian telh a ni. Supplementary Budget atan hian Ministry of Human Resource Development (MHRD) a budget pawmtu Project Approval Board (PAB) chu 26th October 2010 ah a thu a, meeting minute chu 15th February 2011-ah a chhuak chauh a ni . Thil thar anih avangin MHRD pawhin hemi chinfel nan hian hun a hmang rei hle a. Hetiang anih avang hian kum 2010-2011 chhung hian sum kan dawng hman ta lo a ni. Vawi tam tak sorkar laipuiah dilna thawn a nih hnuah pawh sum hi Financial Year 2010-2011 liam hnu April 2,2011 ah SSA Account-ah rawn dah luh chauh anih avangin kum 2011-2012 Opening Balance-ah a luh nghal a ngai a ni. Hei hi State sorkar muan vang a ni lova, MHRD-in financial year chhungin min pe lova, Bank direct transfer a ni a, a tlai tawh tih hre reng chunga financial year tawp hnu a rawn release a ni. A lapse tia sawi chi a ni lo.

Kum 2011-2012 a Uniform leina tur cheng nuai 589.624 pawh hi hman turin District tinah release vek tawh a ni a, tun financial year chhung ngei hian Uniform lei nan hman a ni dawn a, hemi atan hian inbuatsaih mek a ni.

Tun hnaiah cheng nuai 1119.906 lapse ta vek anga sawi hi thudik lo a ni a, PAB minute a sum hmuh tura lo lang atangin expenditure paihchhuah ringawt a ni a, PAB minute a mi hi a hun chhunga MHRD atanga rawn release hman loh tam tak a awm thin a, tun tum ah ngei pawh hian Uniform man tur hi a hun chhungin an rawn release hman lo va, kum 2010-2011 chhunga SSA sum dinhmun dik tak chu hetiang hi a ni e. Kum 2010 -2011 chhunga PAB Approved zat chu cheng nuai 11671.73 a ni. Opening Balance – cheng nuai 333.3 ; 31st March 2011 hma lama sum hmuh zawng zawng cheng nuai 9047.9 ; sum hman zawng zawng cheng nuai 9059.5 ; 31 March 2011-a closing balance chu cheng nuai 321.7 a ni. Hemi hnu 2.4.2011 hian Govt of India atangin cheng nuai 1662.18 hmuh leh a ni a, amaherawhchu financial year tawp hnuah sum hi hmuh a nih miau avangin 2010-2011 chhungin hman theih a ni ta lo a ni.