Vawiin chawhma khan Mizoram SSA Teachers’ Association General Conference Vawi 2 na Electric Veng YMA Hall-ah hman niin, School Education Minister Pu Lalchhandama Ralte chu khuallian a ni.

School Education Minister Pu Lalchhandama Ralte chuan thu sawiin SSA zirtirtu kalkhawmte chu naupangte thinlungah ram, hnam leh sakhaw zahna leh ngaihhlutna tuh turin a chah a. Naupangte hian ram, sakhaw zahna leh ropuinate an hriat loh chuan hmantlak lohin an chhuak mai ang tih a hlauhawm a ni a ti. Continuous Comprehensive Evaluation (CCE) chungchang sawi langin Minister chuan kumin academic session tan hmain sorkarin CCE hman zui zel tur nge hman zui loh tur tih thu ah thutlukna a siam dawn a ni, tiin a sawi a. Zirtirtute chu hun vawng dik a, incheinaah pawh fimkhur turin leh ruihhlo laka fihlim ngei turin a chah bawk a. SSA leh RMSA hnuaia thawk zirtirtute chu dinhmun tha zawka an din theih dan tur sorkarin a ngaihtuah mek a ni, tiin a sawi.

MSSA General Conference hi President Pu R.Lalrinpuia’n a kaihruai a, member thi te sunna hun hman a ni a, zirtirtu post ruakah SSA teacher te a tahtawla dah ngheh an phutna te, 7th Pay mila hlawh lak phutna te, Primary School-ah Pre Primary dah tha an tih thu leh naupangten hma an sawn theih nan English Medium school-ah tun aia uar zawka English hman nise tih te rel a ni. Conference-ah hian zoram hmun hrang hrang atangin an kal khawm a ni.