Vawiin khan MZP Hqrs Lunglei buatsaihin Convention Centre Lunglei ah Zoram Ni hman a ni a, Transport Minister Pu T.J. Lalnuntluanga chu khuallian a ni. Zoram Ni hmanna inkhawm hi K.Lalremruata Vice President MZP Hqrs Lunglei in a kaihruaia, he huna khuallian Minister T.J. Lalnuntluanga chuan  thu sawiin, India Sawrkarin Mizoram Bomb hmanga a beihna te kha tun hunah chuan thinrima la tawh lovin inlungrualna atan hmang zawk ila, kan nunphung leh kan inchei dan ah te hnamdang tihdan aiin kan Mizo niphung ngaihlu ila kan pianna Mizo Hnamah i kir leh ang u a ti. Kan hnam humhim tur chuan kan hnathawhna theuha Pathian duhzawnga rinawm taka kan thawh ngaia, Zirlaite pawhin Nu leh Pa te thawhchhuah ringawt ringlo a, a remchan anga inhlawhfak te pawh kan hreh loh angai a ni tiin, hnamdang te aia rintlak a kan hna te kan thawh hi Mizo Hnam chhan nan a pawimawh a ni a ti bawk. Hnamdang laka kan hnam chhanna atan thalai ten Zirna kawngah tan kan lak nasat hle a ngai a ni Khuallian chuan tiin, Hnam hmangaihna thinlung nei thar ila kan hnathawhna leh kan zirna ah hian kan hnam tan tiin rilru i pu thar theuh ang u a ti. Vawiin Zoram Ni hmanna ah hian HPC Vice Chairman Pu Lawmawma Tochhawng leh MZP Hqrs Lunglei President Lalrammuanawma te pawhin thu sawiin, India Sawrkarin Mizoram Bomb hmanga a beih chungchang Paper Present hmangin Dr. K.C. Malsawmzauva Asst. Professor. MZU in hun a hmang a ni.