Vawiin ni 18.10.2012 chhun dar 12 khan St. Peter's Higher Secondary School Chhingchhip kum 50 tlin lawmna neih a ni a, Pu K. Lianzuala bialtu MLA chuan khuallian niin a hmanpui.

Khuallian Pu Lianzuala chuan he School-in kum 50 a lo tling ta hi a lawmpui thu sawiin, a dintute atang renga Pathian ringtute an ni tih pawh a chiang a ni a ti a. He School hian result tha tak tak pawh an nei fo tawh a, mi tam takin zir chhuakin, sawrkarah pawh mi pawimawh tak tak an awm a, chuvang chuan he hun pawh hian lawm a phu ve reng a ni a ti a, mahse kan lawmna tur chu Pathianah ni zawk se a duh thu a sawi a,Chhingchhip khaw ropuina pakhat chu St. Peter's School hi ni a a hriat thu sawiin, a thawktu te zawng zawng hian thinlung taka chawimawi an phu a ni a ti bawk.

Chhingchhip khuain hmasawnna hmel thar a hmu zel a, Sainik School tur pawh Chhingchhipah dah niin, tunhnai ah nasa tak hma lak a nih thu a sawi a, School tha tak St. Peter's School lo awmsa nen inchawm tawnin tangtai taka hman anih a beisei thu a sawi bawk. Hmanni lawkah MIFCO-ah Cold Storage cheng tam tak man hawn thar a ni a, Chhingchhip-Hualtu kawng pawh laih zawh tawh niin, black topping chiah hmabak a nih thu sawiin, Khawchhung inkal pawhna tur Chhingchhip Mualpui - Venglai kawng siamna tur pawh PWD-in cheng Nuai 25 an ruahman sak thu a sawi bawk, tin, Chhingchhip khaw chawmna tui lak tur cheng Nuai 247 man tur pawh ruahman a nih tawh thu a sawi bawk a ni.

Jubillee lawmna inkhawm hi St. Peter's Higher Secondary School Auditorium-ah hman niin Bro. Peter Vedenayagam chuan inlawmna thu a sawi a, Most Rev. Stephen Rotluanga, CSC, DD Bishop of Aizawl pawhin he hun hi a hmanpui a ni. He School-a Principal lo ni tawh leh zirtirtu lo ni tawh te hriatrengna thilpek chu Khuallian Pu K. Lianzuala leh Most Rev. Stephen Rotluanga, CSC, DD Bishop of Aizawl ten an hlan a ni.

Tun dinhmunah he School-ah hian thawktu mi 32 an awm a, zirlai mi 350 an awm mek a ni.