Mizoram Sorkar ruahmanna kal mekah Lunglei khawpui chhung Melte ram stadium hmun tur chu a hmunhma in a zawh meuh loh avangin helai hmun neitu Pu P.Lalbiaka (Ex-Minister) chuan an mamawh zat ram bigha 6.24 azau chu phal takin a pe. Ram inhlanna hun tawi te hi vawiin khan Sport & Youth Services Minister Pu Zodintluanga office-ah neih a ni.

Vawiina he hun hmannaah hian Sport & Youth Services Minister chuan thusawiin thalai te hmakhua thlira Pu P.Lalbiaka leh a u Pu P.Rohmingthanga (IAS Rtd.) ten an pe chu thil chhuanawm leh entawn tlak a tling a ni. Mi thenkhat ten an ram zimte atan pawh zangnadawmna sum uchuak taka an beisei thin leh Sorkar hmunhma in an ram chhete a dipdal dawn pawha hrethiam duh tlat lo an awm laia hetiang mi thil phal sorkarin a hmu hi thil chhinchhiah tlak, thangtharte pawhin hriatreng tur a tling a ni a ti. He Stadium buatsaih tan tur hi Pu P.Lalbiaka Pa hming chawiin Lena Stadium tih hming put tir a nih tur thu a sawi.

Mizoram Sorkar aiawhin he ram LSC hi UD & PA Principal Secretary, Pu R.L Rinawma’n Pu P.Lalbiaka kut atangin a dawng a. Ruahman dan chuan sum cheng vaibelchhe 24 senga din tur, 8 Lane Synthetic Athletic Track, Football Field, entu mipui 5000 aia tlem lo len theihna tur a ni a.

Kum 2 chhunga sak zawh hman tum a ni. Vawiina ram inhlanna hunah hian ram petu chhung leh khatte, UD & PA Officer te an tel a ni.