Mizoram rawn tlawhtu UN Mission Technical Team-te chuan nimin (12 May, 2014) tlai khan State Planning Board Vice-Chairman Pu H. Liansailova hovin a pisaah inkawmna hun an hmang. He hunah hian Member & Secretary, State Planning Board leh NLUP Implementing Board Vice Chairman, Pu P.L.Thanga bakah Planning, Industries leh Forest department-a officer thenkhatte an tel a ni. He meeting-ah hian UN Team a Pu Sandeep Tandon leh Pi Manjula Bhuyan, UNIDO a thawk ve ve te hovin Mizorama ramhmul damdawi leh thing leh mau te zirchian a, hman tangkai theih dan tur te an sawi a. UNIDO kaltlanga heng mau leh ramhmul damdawi te hi hlawk zawk a chin leh hralhchhuah a nih theih nan hmalak zel tha an ti tlang a ni.

Pi Manjula Bhuyan chuan Mizoramin mau chi hrang tha tak tak a nei chu vanneihthlak a ti a. Chutih rual chuan mau leh mau atanga thilsiam te hi hlawkpui tham a hralh tur chuan Mizote zingah ngei pawh mamawhna a tam lehzual a ngai a ni, a ti. Ram thenawm China mau te hi khawvel in a hriat lar em em nachhan chu ngaihsan tham khawpin an chhuangin an tilar thiam a. Chuvang chuan Mizoram mau te pawh hnamdangte hriat khawpin 'identity' siam thiam a tul a ni, a ti bawk. UN Team te hian vawiin khan Mizoram an chhuahsan a ni.