293/2026-2027

Lawngtlai, 27th April 2026 : Vawiin khan 'Standup Lawngtlai Programme' hnuaia ' Traffic Enforcement Task Force Commitee' leh 'Clean Lawngtlai Committee' chuan Chief Executive Member's Conference Hall-ah thutkhawm an nei a. Lawngtlai Bawrhsap Pu Donny Lalruatsanga chuan a kaihruai.

Pu Donny Lalruatsanga chuan kalkhawmte hnena lawmthu sawina a nei a. Lawngtlai khawpui hmasawnna tura din ' Tho law dir tuah' (Standup Lawngtlai) chak taka kalpui turin Committee- peng hrang hrangte an pawimawh hle tih tarlangin, a bik takin Traffic, Faina leh khawpui cheimawi lamah nasa zawka hmalak a tul hle a ni, a ti. Hmasawnna kawngah Lawngtlai khawpuiin rahbi thar a kai theih nan District Administration leh LADC- ten theihtawp an chhuah chhunzawm zel dawn tih sawiin, a taka bawhzui hunah VC, NGO,Kohhran leh mipuite pawh thahnem ngai taka sawrkar lo thawhpui zel turin a sawm nghal bawk a ni.

Pu C. Lalsawmzuala, Chief Executive Member, LADC chuan Lawngtlai khawpuiin hmel thar a hmuh a, bung thar a kai theihna turin sawrkar angin theihtawp chhuah zel a nih tur thu a sawi a. Khawpui hmasawnna chu mimal taka a vei thu tarlangin, ngaihtuahna sen thiam pawh a tul hle tiin, mawhphurhna neite theihtawp chhuah turin a chah a. Mimal, Pawl, Veng tinte leh Kohhran te pawh thawhpuiah a sawm nghal a ni.

Thutkhawmah hian Lawngtlai khawpui hmasawnna tur kawng hrang hrangte sawiho a ni a. Pu C. Lawmsangzuala, Sanitation Officer, LADC chuan 'Beautification and Zero Waste Corner of Lawngtlai Town' tih hmangin Power Point Presentation - a pe a. Pi Margaret J. Vanlalremmawii, DPO, UD&PA, chuan Mizoram Sawrkar kaltlanga hmalakna tur hmachhawp awm hrang hrangte sawizauna a nei bawk a. Faina leh thianghlimna kawngah mipuite hnenah inzirtirna tha zawk kalpui a tul hle tih tarlangin, hemi kawngah hian VC leh YLA- ten a tam thei ang berin mahni veng theuhah lo puangzar thin se an ti a. Awareness Campaign - mumal taka kalpui ni se tih niin, bawlhlawh bawm tam zawk dah, Zero waste corner, Fencing, Street railings leh thut hahchawlhna siam pawh a pawimawh hle tih pawm tlangin, chak zawka hmalakna kalpui ni se an ti a ni. Khawpui cheimawi kawngah mumal zawkin hmalak ni se, cheimawi ngai hmun, kawtthlêr leh kawtchhuahah te a tul angin cheimawi hna kalpui ni se tih niin, Signage - pawh mumal taka tar thin ni se an ti, a ni.

Traffic Management- chungchang sawho niin, Pu David J. Byhnadaolai, Additional Superintendent of Police; leh Pu HC. Vanlalruatpuia, Transport Officer, LADC, hnen atangin ruahmanna kawng hrang hrang ngaihthlak a ni a. Motor Parking- bikah LADC chuan thuchhuah siam tawhin, VC leh YLA- te nena hmalak a nih tur thu ngaithlak a ni. Lirthei dah kawngah dan bawhchhiatna awm leh awm loh endik thin a tul hle tiin, chak taka Joint Inspection - kalpui ni se an ti a . Lirthei khalhtute zingah Traffic Rules- zawm lo leh hre famkimlo an tam hle tih pawm tlangin, hemi kawngah hian tan lak thar a tul hle tiin, Licence pekchhuah kawngah leh traffic rules- inzirtir kawngah theih ang anga hmalak ni se an ti a ni. Khawpui chhunga 'Motor Workshop ' awmin khawpui a tichep hle tiin, KMMTP- kawnga sawn tura hmalak ni se an ti a ni. Thutkhawm chuan hmalakna kawng hrang hrang awmte endik chu thil pawimawh takah pawmin, thla tin vawikhat endikna hna kalpui thin ni se an ti bawk a ni.

Vawiin thutkhawmah hian 'Traffic Enforcement Task Force Commitee' leh 'Clean Lawngtlai Committee' Member- te leh sawmbik te an telkim tha hle a, Pu K. Lalthanzara, ES,LADC -  chuan lawmthu sawiin hun a khar.