294/2026-2027

Kolasib, 27th April, 2026: Vawiin khan Deputy Commissioner Office Chamber-ah Kolasib DC Pu H. Dolianbuaia chuan Kolasib District chhunga ruihhlo ngaite enkawlna leh naupang fahrah enkawlna (Homes/Centres) hrang hrang pali (4) hnenah Mizoram Governor's Discretionary Grant atanga tanpuina sum a sem.

He tanpuina sum hi Rs. 25,000/- theuh niin, a dawngtute chu - Director, TNT Kolasib; Superintendent, Audrene Scism, Kolasib; Officer In-Charge, The Salvation Army Enna In (Boys Home); leh Superintendent, Omega Centre, Bairabi te an ni.

Tanpuina sum semna hunah hian Kolasib DC Pu H. Dolianbuaia chuan thu sawiin, nu leh pa nei lo fahrahte leh ruihhlo (drugs leh zu) bawia tangte chhanchhuah leh enkawlna kawnga heng Home hrang hrangten hna tha tak an thawk thin chu lawmawm a tih thu a sawi a. Sum leh pai hmuh tur a vangin, harsatna tam tak karah pawh theihtawp chhuaha hna an thawh thin avangin fakawm a tih thu a tarlang. Heng Home hrang hrang kaltlang hian mi tam takin nun thar an neih phah thin a ni tiin, an hmabakah duhsakna a hlan bawk a ni.

Tanpuina sum dawngtute hian sawrkar leh DC chungah lawmthu an sawi a. An hmunhmaa harsatna an tawh mek te, a bikin tui lak (water connection) leh mamawh dang an neih te chu DC hnenah hian an thlen nghal a. DC chuan an harsatna thlente chu a remchan dana  hmalakpui a, amah ngei pawh in hun remchang ah heng home te hi la tlawh a tum thu a sawi bawk.