2684/2026-2027

Lawngtlai, 15h October 2026 : Vawiin khan Lawngtlai Bawrhsap Pu Donny Lalruatsanga kaihhruaiin DC Conference Hall-ah Standup Lawngtlai (Tho Law Dir Tuah ) leh Mizoram Cleanliness Competition 2026 inbuatsaihna sawiho  a ni.

Pu Donny Lalruatsanga chuan kalkhawmte chibai bukin faina leh thianghlimna kawnga Lawngtlai District- in hmasawnna a neih theih nan Standup Lawngtlai (Tho Law Dir Tuah ) leh Mizoram Cleanliness Competition 2026 tha taka kalpui a ni chu thinlung taka lawmawm a tih thu a sawi a.  Standup Lawngtlai (Tho Law Dir Tuah ); Bawhrsap Award leh CEM Cleanliness Competition  - te kalpui mek niin, heihian rah tha a chhuah tan mek a ni, a ti.Mizoram Cleanliness Competition 2026 - ah Lawngtlai District- in dinhmun pakhatna  a hauh theihna turin District Administration leh ADC ten theihtawp an chhuah thu a sawi a. Sawrkar puibawm turin NGOs leh mipuite an pawimawh tak zeta, faina leh thianghlimna kawngah rilru thar pua theihtawp chhuahpui turin Lawngtlai Distrtic mipuite a sawm nghal bawk.

Pu C. Lalsawmzuala CEM (LADC) chuan  Tho Lo Dir Tuah - kaltlangin veng hrang hrangah hmasawnna hmuh tur a awm mek tih tarlangin, heihian Mizoram Cleanliness Competition 2026 ah rah tha a chhuah ngei a beiseiawm a ti a. Lawngtlai District - tan LADC sawrkar a ding tlat dawn tih sawiin, tun aia hmasawnna  tha zawk awm tura hmalak zel a nih tur thu a sawi  a ni.

Pu C. Lawmsangzuala, Sanitation & Waste Management Officer, LADC chuan Standup Lawngtlai (Tho Law Dir Tuah ) hnuaia hmalakna leh MCC 2026 'Key Points & Action Plan'  sawizauna a nei bawk a ni.

Mizoram Cleanliness Competition 2026 atana inbuatsaihna tur kawng hrang hrang sawiho a ni a. October leh November thla chhungin CYLA leh VC hmalaknain faina puala hnathlâng neih ni se, a bik takin khawpui chhunga VC ten an huamchhunga  retaining wall- te rawng hnawih thar  ni se an ti a. DC Office lamin a tul angin 'signages' siamin lo dah se, Tho Law Dir Tuah kaltlangin Lawngtlai kawtchhuah paliah 'Welcome Signage' dah ni se an ti bawk a ni. Khawpui chhunga Veng - 12 ah 'Bamboo Basket' pahnih theuh dah ni se, LWA leh MHIP - ten veng tina chhungkaw tin luhchhuahin bawlhlawh thliarhran dan zirtirna kalpui se, Home Composting - kalpui tura hmalak ni se an ti bawk a ni.

Thutkhawmah hian Standup Lawngtlai (Tho Law Dir Tuah ) leh Mizoram Cleanliness Competition 2026 Member- te an tel kim tha hle a, Pu K. Lalthanzara, ES (LADC) chuan lawmthu sawiin hun a khar.