Vawiin khan State Supervisory Board chu an Chairman, Health Minster Pu Lal Thanzara hovin Chief Minister Conference Hall-ah Pre-Conception & Pre-Natal Diagnostic Techniques (Prohibition of Sex Selection) Act, 1994 chungchang sawiin an thukhawm. PC&PNDT Act hi khawl hmanga nau pian hmaa mipa nge hmeichhia a nih zawnchhuah leh a kaihhnawih dangte khapna Dan a ni.
He meeting-ah hian State Supervisory Board Secretary, Dr. Lalbiakkima, Hospital and Medical Education Director chuan Mizorama PC&PNDT Act kalpui dan tlangpui report a pe a. He dan tobul leh kalpui zel dan tur te rel a ni bawk.
PC&PNDT Act hi India ram chhunga hmeichhe fa neih duhloh vanga mipa leh hmeichhia zat inthlau lutuk tih hmasawn nan a hmalakna kawng pakhat a ni a. Hemi kawngah hian Mizoram chu inchhiarpui hnuhnung ber khan ram pum state dangte lakah chuan mipa leh hmeichhe inzat teuhna ber (971/1000 : 2011 Census Prov.) niin, state hmasawn ber a ni.
PC&PNDT Act hi Mizoramah chuan kum 2006 khan a buaipuitu tur State Supervisory Board leh peng dangte chu siamin, hman tan a ni a. He dan hian mihring kawchhung enna khawl, Ultrasound leh Echocardiography lei, hman leh fak chungchangah ruahmanna khauh tak a siam a. Dan bawh chhia chu pawisa chawi bakah lungin tan thlenga hrem theih an ni.
