Mizoram Chief Minister Pu Lal Thanhawla hovin vawiin chawhnu khan a Secretariat Conference Hall-ah, a Council of Ministers, Parliamentary Secretaries, Chief Secretary , Secretaries to the Govt. of Mizoram leh Head of Department ten High Level Meeting an nei.

He meeting pawimawh takah hian 14th Finance Commission of India a Member-te, February 26 leh 27 a Mizorama lokal tur hnenah Mizoram mamawh tur chi hrang hrang sorkarin a thehluh tur  thlirlawkna leh siamthat ngai laisiamrem na hun  neih a ni. Tun 14th Financial Commission of India, Mizoram rawn tlawh tur te chu Chairman Dr. Y.V. Reddy, memberte Prof. Abhijit Sen, Ms Sushma Nath, Dr. M. Govinda Rao, Dr. Sudipto Mundle leh Secretary Shri A.N. Jha, IAS te an ni a. An ni hnenah thehluh tur hian Mizoram sawrkar chuan proposal lian tak tak thehluh tur Rs 38,417.26 crore laia lian a siam bak ah State mamawh bik pawimawh zual atan Department 28 leh Autonomous District Council 3 ten State Specific Needs tih hnuai ah Rs 6000 crore chuang a lian proposals an thehlut dawn bawk a ni. 14th Finance Commission te hian State 18 an tlawh tawh a, February 26 hian Mizoram a Local Bodies aiawhtute, Political Party hruaitute leh Trade association hrang hrang hruaitu te an kawm hmasak hnu in February 27 hian Chief Minister leh a Cabinet Minister te leh sawrkar hotu lu te an kawm dawn a ni.

14th Finance Commission-a thil pawimawh thehluh tur zingah hian Mizoram a kawngpui dung 5160 km zinga 2940 km alkatra luan sa  leh 2220km black topping la tih loh te  leh sawrkar insak sa te leh hmunhma 6,19,500sq.m a zau te Kum 5 chhunga enkawl nan Rs 500 crore ruahmanna, State disaster response and management din tak enkawlna tur sum ruahmanna te, 14th Finance Commission chhunga  Autonomous District council 3 te inenkawlna tur Rs.1850.66 Crore, Local Bodies- Municipal Council leh Village Council te tana senso tur te, 2014-15 a din tur 14th Finance Commission chhunga tih puitlin tum Lokayukta senso atan Rs. 122.21 crore ruahmanna te bakah hnaruak hnawhkhah ngai, hnathar laktur, contract a sawrkarah chhawrte leh muster roll a Sawrkarin a chhawr mek te tinghehna tura ruahmanna siamte hu a pawimawh zual deuh te an ni a.

He meeting pawimawh tak kaihruaitu chief Minister Pu Lal Thanhawla, 9th Finance Commission  Of India a member lo ni tawh chuan, Finance Commission in Plan chiangkuang leh awm ze nei Statistics tha tak leh figure leh number dik a ngaih pawimawh thu a sawi a. Mizoram Sawrkar tana mamawh leh pawimawh atana ruahmanna siam thehlut tur pawh in an proposal te behchhan chu thil dik leh belhchian dawl a nih a ngai a ti a. Kum liamta ah te khan Mizoram tana detailed project report(DPR) siamtu Department hrang hrang te chu State dang te aiin an muang fual bik fo thin a, Mizoram tana phur taka thawka an insiam that a ngai ang a ti. Ngaih pawimawh ber tur chu tuna Mizoram in Shareable tax and service tax for small states a 0.269% leh 0.273% chiah 32.2% Central in Revenue a hmuh te atang State te hnena a sem atanga a neih mek chu state ralmuang ber pawl a nih vang te, hmunkil khawr a awm a nih vang te leh dawmkai ngai te zinga mi kan nih vanga  1% ve ve a chantir tura nawr a ni a. District thar siam chu thil awl ni lo mahse mamawhna avanga District thar siam tumna chu kalpui a ngai anga. He mi senso atan pawh hian 14th Finance Commission ah senso tur leh ruahhmanna pawimawh te thlen a ni ang a ti a. State specific Needs hnuaia ruahmanna a tel National Food security hman ve tura ruahhmanna pawh chu ngaih pawimawh ber tur te zinga mi a nih tur thu a sawi a ni.