State Advisory Council chu vawiin khan an Chairman Pu Lalsawta, Education Minister hovin a pisa-ah an thukhawm.

Education Minister Pu Lalsawta chuan State Advisory Council din chhan sawifiahin naupang kum 6 atanga kum 14 ten a thlawna lehkha an zir ngei ngei theihna tur - Right to Education Act - 2009 chu sorkar-in hlawk leh awmze nei taka a kalpui chhunzawm zelna tura thurawn pe tu tur a ni, a ti. He council-ah hian Education Department Commissioner Pu K. Lal Nghinglova chu Member Secretary niin Law & Judicial Deptt. Secretary, School Education Deptt.  Director leh Jt. Director, SCERT Director leh Jt.Director,  Health Director, Social Welfare Director, School Education Deptt.  Deputy Secretary leh Under Secretary, SSA aiawhte bakah IASE Principal, PC Girls School Headmistress leh DIET Lecturer Pu Rosiamliana te chu council member an ni.

Meeting-ah hian RTE Act-2009 kalpui a nih dan leh hmalakna hrang hrang a kalpui tawh leh kalpui mek te thlirho a ni a. He dan hian sorkar, deficit leh private sikulte zawng zawng a huam a, dan zawm tura a phut leh tihtur a tuk te pawh thuhmun vek an ni tih sawi langin, naupang te kutthawh a hrem emaw an rilru hliam tur zawnga hremna (corporal punishment) chelek thin an la awm nia hriain hei hi tihrem a tul takzet a ni, an ti. Sikula naupang admit turin Screening test neih khap tlat a nih bakah hriattirna (notification) chhuah hmasa lova pawisa khawn (donation) te pawh he dan hmang hian khap tlat a nih thu tarlan a ni bawk. RTE Act-2009 chu tha zawka mipuiten an zawm theihnaturin mipui inzirtirna darhzau zawka kalpui ni se tiin meeting hian a rel a ni.