1886/2022-2023
Aizawl, 12th September 2022 : Vawiin khan National Tobacco Control Programme, National Health Mission leh Indian Society on Tobacco & Health Mizoram buatsaihin, "Zuk leh hmuam laka zirlaite venhim" tih thupui hmangin State Anti-Tobacco Day 2022 chu Vanapa Hall-ah hman a ni a. Dr ZR Thiamsanga, MLA, Vice Chairman, Health & Family Welfare Board chu khuallian a ni.

Khuallian Dr ZR Thiamsanga chuan thu sawiin zuk leh hmuam hmang nasa te zingah Mizoram hming a la lang reng mai chu a vanduaithlak tiin hemi kawngah hian hmasawn a tul thu a sawi a. Zuk leh hmuam hi hriselna ti chhe tu anih zia hriat thar fo a, inthiarfihlim san a pawimawh tih sawiin zuk leh hmuam avanga naupai hrisel loh phah theih dan te, nau chhiat theih anih thu te, nau sawngnawi neih phah theihna hial anih thute a sawi a. Zuk leh hmuam tel lova awm theih anih zia sawiin Pu Thiamsanga chuan Mizoten zuk leh hmuam lei nan sum thahnem tak kan khawhral thin hi pawi a tih thu a tarlang a. Kalkhawmte chu zuk leh hmuam laka fihlim turin a ngen a ni.

Dr Eric Zomawia, Mission Director, National Health Mission chuan thupui “Zuk leh hmuam laka zirlaite venhim” chungchang hi powerpoint presentation hmangin a sawi a. Zuk leh hmuam that loh zia inzirtirna a pawimawh zia te, hmalakna kal mek te, natna inkaichhawn theih loh (NCD) chungchang te, nunphung hrisel (healthy lifestyle)neih a pawimawh zia te sawiin kalkhawmte pawh hetiang harsatna chi hrang hrang thlentu zuk leh hmuam ti lo turin a chah bawk a ni.

Zuk leh hmuam kaihhnawih natna chi hrang hrang avangin a chingtute zinga a zatve velin nunna an chan phah thin a. Chuvangin thalai te chu vaihlo leh vaihlo atanga thilsiam laka fihlim a, nundan phung hrisel neih a pawimawh zia uar takin a sawi a. Zirna in zawng zawngte Tobacco Free Educational Institution (ToFEI) ni vek tura hmalakna kal mek pawh tarlangin hmalakna kal mek te a sawi a. Department hrang hrangte nen Mizoram a zirna in zawng zawngte chu 100% Tobacco Free Educational Institution (ToFEI) an nih theihna turin chak zawka hmalak a pawimawh zia a sawi.

Vawiina State Anti-Tobacco Day programme hi Pi H. Vanlalchuangi, Addl. Secretary Health & Family Welfare in a kaihruai a. Thusawitu zingah Er. R. Lalthakima, Secretary, Indian Society on Tobacco & Health Mizoram chuan Mizoram a zuk leh hmuam dona kawnga hmalakna an lo kalpui tawh thin dan kimchang takin a sawi a. Zuk leh hmuam khuahkhirhna dan kenkawh kawnga hmalakna te, Awareness campaign buatsaihte leh hmalakna hrang hrang avanga Mizoram a zuk leh hmuam dona kawnga hmasawnna lawmawm lo awm chho te sawi langin hemi kawngah hian nasa zawka tan tlan a pawimawh zia a sawi a. Dr H. Lalthlangliana, MCS, Director, School Education Department pawhin thu sawiin Mizoram a zuk leh hmuam dona kawnga hmalakna in awmzia a neih nasat zia te, khawtlang huap programme pawimawh ah te pawh hmuh theih khawpa hmasawnna a awm thu a sawi bawk a. Dr.Lalbiakkima, Executive Member, ISTH, Mizoram chuan lawmthu sawiin hun hnung a khar a ni.

Indian Society on Tobacco & Health Mizoram hi kum 1989 atanga tha thlah lova zuk leh hmuam dona kawnga theih tawp chhuah a hma la chho thin pawl an ni a. National Health Mission hi hriselna kawnga Muzoramin hma a sawn theihna tura kawng hrang hranga hma la tu lian tak a ni a. National Tobacco Control Programme pawh hi National Health Mission hnuaia mipui vantlang hriselna kawnga hmalatu hrang hrang zinga pakhat an ni bawk.


Aizawl a programme hman a nih rual hian District hrang hrangahte Mizoram State Anti-Tobacco Day hi hman a ni bawk a ni.

Attachment

  • Loading attachment...