Indo-Bangla ramri hung a nih avanga khaw thenkhatin harsatna an tâwk nia sawi chungchangah, State Boundary Committee-te chuan Tlabung chhehvela ramri hung hna kalpuina khuate nimin (31st October, 2012) khan a hmunah an tlawh a; border fencing hna thawh a nihdan chipchiar taka an zirchian bâkah, border fencing avanga harsatna tâwk mipuite harsatna a hmunah an enfiah a ni.

Vawiina State Boundary Committee-ten an tlawh khuaa chêng mipuite chuan boundary committee hruaitute hnenah hian an harsatna te lo thlenin, ramri hung a nih avanga leilet tam tak an chân thu te, zàngnadawmna pêk a nih dana harsatna an tawh thu te an lo hrilh a; heng an harsatna te hi sutkian tuma theihtâwp an chhuah tur thu leh a tul anga bawhzuisak an tum thu, Boundary Committee hruaitute chuan an sawi a ni.

Hei bakah hian ramri hung chin hlatzawng chu zero point atanga metre 150-200 inkar ni tura norm siam a nih laiin, norm lo anga ramri hung hna kalpui a ni tih State Boundary Committee hruaitute chuan an sawi a; ramri hung hna thawh tan a nih dawnin ruahmanna felfai a awm lo nia sawiin Border Fencing chuan a tum a thelh nia an hriat thu an sawi.

State Boundary Coomittee-te hi an chairman Pu C. Chawngkunga hovin member pahnih - Wg. Cmdr. Lalnghinglova leh Pu Lalduhawma te an ni a, bialtu Minister Pu Nihar Kanti Chakma bâkah Revenue department lama hotuten an tawimawm a ni.