Vawiin khan Mizoram State Library, Art & Culture Department buatsaihin State Central Library Reading Hall, New Secretariat Complex, Aizawl ah “A good book has no Ending – Knowledge for all” tih thupui hmangin Librarian Day vawi 8 na lawmna hun hman a ni a, Pu Sangdingliana IAS, Secretary Art & Culture chu Khuallian a ni.

Pu Sangdingliana chuan Internet hmanga thuziak thehdarh leh chhiar mai a awlsam tawh em em rualin lehkhabu hlutna hi chu ala ngai reng a ni, a ti a,  zirlai naupangte leh Librarian Day hmanga kalkhawmte chu Lekhabu tha kawm ngeih a, ngaina a, finna tam zawk haichhuah nan library te chu tlawh uar zel turin a fuih. 

Librarian Day lawmnaah hian Dr Lalbiaksanga Hnamte, Librarian, Synod Hospital chuan “Library Hmasawnna atana Pawimawh” tih thupuia hmangin hun a hmang a, Library a Lehkhabu leh Library enkawltute an pawimawh rualin a hmangtute an pawimawh hle a ni, a ti a, Khawvel hmasawnna hrang hrangte Library hmasawna atana hman tangkai  thiam leh Library tlawhtu tam zawk hip thei tura hmalakna hrang hrang neih a tul hle a ni, a ti bawk.

Vawiin 8th Librarian Day hmanna hun hi Pu R.Hmingthanzuala, Director Art & Culture department in a kaihruaia, Pu Lalramliana, State Librarian hnen atangin report ngaihthlak niin State Library atanga lehkhabu hawh tha lawmman semna hun hman a ni bawk. Librarian Day lawmna hi Mizoram Upa Pawl (MUP), Mizo Hmeichhe Insuihkhawm Pawl  (MHIP), Mizo Academy of Letters (MAL) aiawhte bakah school naupang thahnem takten an telpui a ni. National Librarian day hi Dr SR Ranganathan hriatreng nan a hman a ni. 

Mizorama Public library hmasaber anga kan neih Sub-divisional library hi 1969 khan Sikulpuikawn ah din a ni a, Mizoram State Library, State Central Library tia hriat bawk hi 1974 ah din a ni. Raja Ram Mohan Roy Library Foundation nena tangkawpin State Library building sak a ni a, 22nd March 2011 khan hawn a ni. National Mission on Libraries (NML), Ministry of Culture, Govt. of India tanpuina in State Library Extension building hi sak zawh leh a ni bawk. State library, Art & Culture department hian Govt. recognised library 500 a enkawl a, State library member 6539 awm in lehkhabu 65636 a awm a, heng lekhabute hi Libsys Software hmanga computerized niin Data entry tih chhoh mek a ni.