Vawiin khan Lunglei District Water and Sanitation Committee chu an Chairman Lunglei DC Dr Ankita Chakravarty, IAS kaihhruaiin a DC Conference Hall-ah an thukhawm. Meeting-ah hian a kawihhnawih sawrkar department hotute bakah tlawmngai pawl aiawhte an tel. Lungei District huamchhunga Swachh Bharat Mission (Gramin) hmalakna kum 2017-2018 – a kalpui dan thlirletna neiin, kumin 2018-2019 chhunga hmalak dan tur leh Swachh Survekshan Grameen 2018 kalpui dan tur sawiho a ni.

Dr Ankita Chakravarty chuan kawng tinrenga hmasawn tur chuan faina leh thianghlimna a pawimawh a ni tiin Lunglei District chu ulau taka zun leh ek thiar kawnga district fihlim - Open Defecation Free (ODF) a nih ve thuai theihna tura theihtawp chhuah theuh turin kalkhawmte a chah a. Lunglei DC chuan Lunglei District huamchhunga ek in sak tawh te tha tak leh felfai taka enkawl zui zel turin mipuite a chah bawk.

EE PHED Lunglei Rural Watsan Division leh Member Secretary ni bawk Er Allan Lalthalura chuan meeting neih chhan sawi hawnna neiin SBM (G) kal tlangin Lunglei District chu khawlaia inthiar awm lohna, chhung tinin inthiarna ek in tha tawk an neih vekna District ni turin chak taka hmalak mek a nih thu a sawi a. Lunglei District-ah SBM (G) kalpui a nih chhungkaw 13,257 (Lunglei RD Block – 1376, Hnahthial RD Block – 598, Lungsen RD Block – 4133, Bunghmun RD Block - 7150) te tan ek in (Individual Household Latrine-IHHL) sak sak an nih tawh thu a tarlang. Swachh Bharat Kosh hnuaiah ek in 1747 siam that a ni tawh bawk. 

Meeting-ah hian Lunglei RD Block leh Hnahthial RD Block huamchhungah District Level ODF Verification neih thuai ni se tih rel a ni a. He enfiahna kalpui tur hian District Level Verification Team din a ni dawn a, Deputy Commissioner chu Chairman niin SE emaw EE, PHE chu Member-Secretary a ni anga, DEO, PD DRDA, CMO, DSWO, leh MJA, YMA, MHIP leh MUP aiawhte an tel bawk ang. He District Level Team-hian khawchhunga chenna in, Zirna in hrang hrang leh Community Hall an endik dawn a ni. Meeting-ah hian vantlang inthiarna (Community Sanitary Complex) leh bawlhhlawh sawngbawlna (Solid and Liquid Waste Management) khaw hrang hranga sak dan tur ruahmanna sawiho a ni bawk.