2748/2026-2027

Aizawl, the 21st October, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Pu H. Lalengmawia, IAS (Rtd.) chu Durbar Hall, Lok Bhavan-ah rinawmna thu tiam tirin Mizoram State Information Commission hnuaia State Chief Information Commissioner atan a lalut.

Lakluhna inkhawmah hian Chief Secretary Pu Khilli Ram Meena chuan Larsap-in State Chief Information Commissioner atana Pu H. Lalengmawia, IAS (Rtd.) a ruatna notification a chhiar chhuak hmasa a. Hemi hnu hian Larsap chuan Pu H. Lalengmawia chu rinawmna thutiam chham tirin State Chief Information Commissioner atan a lalut a ni.

He hunah hian Public Works Department Minister Pu Vanlalhlana, Animal Husbandry & Veterinary Minister Pu C. Lalsawivunga, Environment, Forests & Climate Change Minister Minister Pu Lalthansanga, Leader of Opposition Pu Lalchhandama Ralte leh mi pawimawh dangte an tel a ni.

State Chief Information Commissioner atana lakluh tak Pu H. Lalengmawia hi Kawrtethawveng, Mamit District khaw chhuak niin, thiamna lamah M.A. (Public Administration) Gold Medalist, North-Eastern Hill University (NEHU) niin, NEHU-ah kum 3 chhung Lecturer hna a thawk zui a. Kum 1991 khan Mizoram Civil Service zawmin batch topper a ni a. March ni 19, 2014 khan Indian Administrative Service (IAS) ah hlankai niin, AGMUT Cadre 2005 pek a ni.

Mizoram sawkarah hna pawimawh tak tak Joint Chief Electoral Officer, State Protocol Officer, Director, School Education Department, Champhai leh Kolasib District Bawrhsap, Commisioner & Secretary Home, Environment, Forests & Climate Change, Health & Family Welfare, Power & Electricity, Higher & Technical Education-te chelh tawhin kum 2024 khan thla khat chhung Chief Secretary hna a chelh a ni.

Election Observer niin State hrang hrangah duty-in a chhuak tawh a, official duty-in Sri Lanka, Norway, United Kingdom leh Thailand-te a tlawh tawh bawk. A hna thawh that avangin kum 2025 khan Chief Minister's Award for Excellency in Public Administration a dawng a. November ni 30, 2025 khan superannuation pension-in a chhuak a ni.

Dinhmun pawimawh tak tak a chelh zingah Chairman, Empowered Committee, Government of Mizoram; Chairman, Indian Red Cross Society, Mizoram State Branch; Member, North Eastern Regional Institute of Science and Technology (NERIST) Board; Member, Regional Institute of Paramedical and Nursing Sciences (RIPANS) Board leh Executive Council Member, Mizoram University (MZU) te a tel a ni.

Pu H. Lalengmawia, IAS (Rtd.) hi a nupui fanaute nen Zemabawk, Aizawlah an cheng mek a ni.