Mizoram State Chief Information Commissioner Pu Lal Dingliana, IFS (Rtd) chu tun thla ni 18 - 21 chhung khan sorkar thil pawimawh ti in New Delhi-ah a zin a. Delhi a cham chhung hian Central Chief Information Commissioner Pu Satyananda Misra nen darkar khat chuang inkawmna hun neiin thil pawimawh chi hrang hrang an sawi dun a. CM-in Mizoram tlawh tura a lo sawm tawh thu Pu Lal Dingliana hian hrilh nawn lehin Central CIC chuan hun remchang hmasa berah Mizoram rawn tlawh a tum thu a lo hrilh a ni.

Sorkar laipuia External Affairs Ministry in tunhma a an tih ngailoh takin Pu Lal Dingliana hi thlahna hun leh duhsakna hlanna hun inkhawm an lo buatsaihsak a. A puala hun Ministry of External Affairs, South Block, New Delhi-a neiah chuan ngaihhruina thilpek mawi tak hlan a ni a. He huna thusawitu Pu Ranjan Mathai, Foreign Secretary leh Indian Foreign Service Association President ni bawk chuan Mizoram kilkhawr tak atanga seilian, thingtuah pu leh tuichawi baka MR Driver hna te thawka hlawhtling chhuak Pu Lal Dingliana chu fakin ram 5 chuanga India Ambassador hna lo thawk tawh chu Mizorama a hna thar a thawh zelnaah duhsakna a hlan a ni.

An hna atanga an chawlh tawh hnuah IFS Grade-I thleng pha chin te tana chawimawina India sorkarin a pek thin Diplomatic Passport Pu Lal Dingliana te nupa hnenah an dam chhung atan pek an ni a. Zofate zinga hetiang dawng hmasa ber leh awmchhun an la ni. Ambassodor puitling a thawk tawh mahni se Grade I thleng pha lo chuan an hna atanga an chawlh hnuah Diplomatic Passport hi sorkar hnenah an pek let leh a tul thin a ni.