14/2023-2024

Aizawl the 3rd April 2023 : Vawiin khan Mizoram State Chief Information Commissioner Pu Lalnunmawia Chuango chuan Indira Gandhi National Open University (IGNOU) Convocation vawi 36-na programme chu khualzahawm niin a hmanpui. IGNOU Regional Centre, Aizawl hian convocation hi Dawrpui Multipurpose Centre ah an buatsaih a ni.

Pu Lalnunmawia Chuaungo chuan zirlai hlawhtlinna chang tharte lawmpuiin an hmalam hun atan duhsakna a hlan a, an zinga a tel thei chu vannei a intih thu a sawi. Zirlaite chu sawrkar hna ringawt ngaihven lo va, mahni kea din tum turin a fuih a. Khawi sawrkarah mah sawrkar hna hian mitin a daih seng lo tiin ram hmasawnna tur chuan private sector-te tihlen a ngai, a ti a. Mi tute pawhin midangte aia thiam bik talent kan nei theuh a, heng kan talent dawn te hmang tangkaia eizawnna siam tum hi hlawhtlin awlsamna kawng a ni, a ti. Sawrkar hna chuan daihsen loh chin a nei a, private sector erawh chuan tawp chin a nei lo, tiin ram a changkan poh leh private sector-ah chuan eizawnna a pung zel dawn CIC chuan a ti a. Zirlai te chu Mizoram State kalphung duangtu policy maker dinhmun luahtu ni lo mahse, a tha zawnga nawr kal theitu an ni tih inhre turin khual zahawm chuan a chah a ni.

Sr Regional Director Dr SR Zonunthara pawhin thusawiin IGNOU Aizawl Region Centre dinhmun tlangpui a sawi a. Sawrkar laipui duhdan angin skill development lamah hma lain Labour Employment and Skill Development (LESDE) Department nena thawk hovin IGNOU-MSDE Centre chu ITI Aizawl, Lunglei leh Siaha bakah, Pradhan Mantri Kaushal Kendra (PMKK) Aizawl leh Champhaiah te din a ni, a ti a. Higher and Technical Education Department leh Mizoram University nena tangkawpin National Training Programme kalpui a nih thu a sawi a. Aizawl Civil Hospital leh Mizoram College of Nursing ah te Learner’s Support Centre din a nih thu te, Mizoram College hrang hrang ah Learner Support Centre an neih thu te leh an hmalakna pawimawh dang te Sr Regional Director hian a sawi a ni.

IGNOU Convocation Programme hi India ram pumah hman a ni a. An University Headquarters, Maidan Garhi, New Delhi ah a lawmna pui ber neih a ni a. He programme hi live a pek chhuah niin Mizoramah pawh thlir ho a ni. Vawiin hian IGNOU hian India ram pumah zirlai 2,79,917 hnenah degree hrang hrang an pe chhuak a. Mizoramah hian Master Degree 408, Bachelor Degree 534, Diploma 59 leh Certificate 81, a vaia belhkhawmin zirlai hlawhtling 1082 hnenah an pechhuak a ni. Aizawl Regional Centre in Convocation a buatsaihah hian zirlai 380 chuan an tel a ni.