Vawiin khan State Consultative Committee on Public Distribution System (PDS) chu an Chairman Lok Sabha MP Pu C.L.Ruala hovin State Guest House Conference Hall-ah an thukhawm. Mizoram sorkar aiawhin FCS&CA Secretary & Director Pu K.Riachho leh Department officials bakah Food Corporation of India aiawhin Pu B.Prakasham, General Manager, FCI (NEF), Shillong leh officials dangten he meeting-ah telin May 2011 thlenga Mizoram buhfai, chini leh wheat supply chungchang chipchiar takin an sawiho a ni.
Committee Chairman Pu C.L.Ruala chuan FCI-in Mizoram state-a an hnathawh that leh hmalakna chungchangah lawmthu sawiin harsatna an tawh ang ang te chu sorkarin lo bawhzui leh sutkian zel a inhuam thu a hrilh a. Tuna FCI Main Godown Tanhril ami chu a hmun remchang loh leh a chep ta lutuk anga lan avangin Sairang-ah hmun zau leh remchang zawk zawng tura sorkarin a ngen chu tihfel thuai a, a theih chuan insawn pawh a that a rin zawk thu a hrilh bawk.

FCI General Manager Pu Prakasham chuan tun hnaia Lawngtlai District-ah Godown thar, staff kimin an ruahman theih tak thu sawiin May ni 15 khian hawn a beiseiawm a ni, a ti a. Mizorama harsatna an tawh lian ber chu fur ruahtui nasat avang leh kawng chhiat avang a ni tiin Chairman hnenah pawh kum tina he harsatna an tawh ziah thin chu fur a tan leh hma ngeia sutkian dan tur ngaihtuah sak a tul a ni, a ti bawk. Mizoram state chhungah Godown an la neih tam tawk loh avangin sum leh a supply lamah harsatna awm lo mahse a dahthatna tur hmun awm loh avangin harsatna an tawh thin thu a hrilh bawk. FCI chuan Saiha, Tuipang, Tlabung, Ngopa leh Sakawrdai ah te pawh ram remchang hmuh a nih veleh Godown sakna tur sum ruahman tura hmalak an tum thu a sawilang bawk a ni.

Mizoram chhungah hian Ration Card Holder a vaiin 3,16,686 an awm a, Fair Price Shop 1226 a awm bawk a ni. April 2011 thla chhung khan FCI atangin Buhfai 14944.23 MT, Wheat 894 MT leh Chini 320 MT hmuh/phurh thlen a ni a. May thla (upto 3.5.2011) chhungin Buhfai 1160 MT pawh phurh thlen tawh a ni bawk. Mizoram state chhunga Buhfai leh thildang phurh luh chungchanga harsatna tawh mek chu NEF Railways hotute nen Thawhtanni (9.5.2011)-ah sawiho an rel bawk a ni.