Mizoram Government Doctors' Association(MGDA) chuan vawiin khan an Annual General Conference vawi 28 chu Referral Hospital, Falkawn ah an hmang a. Conference hawna inkhawm ah hian Chief Minister Pu Lal Thanhawla chu khuallian niin Health Minister Pu Lalrinliana Sailo chu khualzahawm a ni a, inkhawm hi Vice President MGDA Dr K. Lalbiakzuala'n a kaihruai a ni.

Chief Minister Pu Lal Thanhawla chuan doctor kalkhawmte chu missionary rilru pu a, an thiamna leh hriatna, neitu chang changa, an rawngbawlna khawvel pawn 'noble profession' tia a hriat chu Mizo mipui leh Mizoram tan thawk zel tur leh hriselna kawngah theihtawp chhuah turin a chah a. Sawrkar doctor te chu sawrkar hnathawk an nih angin sum leh pai harsat zia hre ber tu te zingah mi an ni tiin sum renchem dan, hman zai dan leh hman dik dan zira an hnuai thawk te pawh hemi lamah hrilhriat leh zirtir a tul thu a sawi.

Pu Lal Thanhawla chuan doctor te chu mipui hriselna lama thawktu ber an nih angin zuk leh hmuam, leh kuhva ah te fihhlim turin a chah a, hospital compound te thianghlim leh fai thei ang bera vawng tura a chhah bakah damlo leh damdawiin tlawhtu te pawh hemi kawngah zirtir uara  tul thu sawi bawk a ni. AYUSH chu mirethei leh mi hnuaihnung zawk ten an tangkai pui theih thu sawiin tun aia nasa zawka  kalpui tula thu a sawi. NHRM chu a nih dan ang leh dik taka hman chhoh a nih chuan  thingtlang mipuite tan hriselna tha zawk an neih theihna hmarua pawimawh tak leh an changkanna ni thei tur a ni a ti. Chief Minister chuan District Hospital te tun aia thuamthat leh tih changtlun an nih chuan damlo, Mizoram pawna refer an tlem theih thu sawiin, hemi hian nunna a chhan theih bakah leh leh sum leh pai  pawh save a nih theih thu a sawi.

Health Minister Pu Lalrinliana Sailo chuan Hmarchhak biala NHRM kal pui kawngah Mizoram in pahnihna a la chu doctor leh hriselna lama thawktu te inpekna leh thawh rah a ni, a ti a. Health Minister chuan doctor leh engineer tam zawkte chu quota leh sawrkar in a tum saka zir te an nih thu sawiin thahnemngai taka tan la thar a thawk turin a fuih a ni. Minister hian RSBY chu tun aia tangkai leh huamzau zawka kalpui a tul thu sawiin RSBY kal zel turah CMO leh MO te chuan a zau thei ang bera cover ngei tura hma la turin a chah bawk a ni. 

MGDA hruaitu te chuan tunhnaia Sawrkar in an Service Rules a siamthat chu Chief Minister leh Health Minister-te chhungah lawmthu an hrilh a. Tlai lamah MGDA inthlanna hun hmangin  MJA ten an inthlanpui a ni. 

Inkhawm zawh hian Chief Minister chuan Serchhip a pan nghal a ni.