Vawiin khan Aijal Club-ah National Bank for Agriculture and Rural Development (NABARD) buatsaihin State Credit Seminar 2018-2019 neih a ni a. Agriculture Minister Pu C.Lalrinsanga chu khuallian ni in he hun hi a hmanpui a ni.
Pu C.Lalrinsanga chuan Mizoram hmasawnna tura NABARD hnathawh tam zia sawiin thingtlang hmun hrang hrangah hmasawnna ruhrel pawimawh tak tak an din bakah mamawhtuten sum an puk theih nan financial institution hrang hrang - MRB, Apex Bank leh a dangte ti chak turin tha an thawh tam hle, a ti. Kum nga kum ruk kalta chhung khan kum tina Mizoram sumpai dinhmun thanna chu 9% a ni a, GSDP ah service sector hian 43.49% zet a awh a, hei hian Mizoram economy khalh kaltu pawimawh ber chu service sector a nihzia a tichiang hle a, chutih laiin industry sector-in 24.84% , Agriculture & Allied Sector chuan 31.67% a awh thung, Minister chuan a ti a. Sawrkar tharah hian Chief Minister kaihhruaina in mau (bamboo) lam hawiin nasa takin hma lak a ni dawn a, a hlawhtlinna turin sawrkar laipui leh financial institution dangte tawiawmna a pawimawh hle dawn a ni, a ti.
Agriculture sector hmasawnna turin sawrkar chuan thingtlangah hmasawnna ruhrel din turin nasa lehzuala tan lak a tum tiin Agriculture Minister chuan NABARD in RIDF (Rural Infrastructure Development Fund) kaltlanga nasa taka sawrkar a tanpui thin avang leh a tanpui zel dawn avangin lawm thu a sawi a. A bik takin thingtlang khuate tlawhpawhna tur kawng tha zawk siam tum a nih avangin NABARD chu thawhhona thuk zawk neih puiah a sawm a, loneitute tharchhuah dahkhawlna (storage facility) leh market tihchangtlunna tura tan lak an tum thu Pu C.Lalrinsanga chuan a sawi a ni. Agriculture hmasawnna turin cooperative movement lian tham taka kalpui a tum tih sawiin Mizoram economy chak taka a than theihna tura thawhhopuiah kalkhawm te a sawm a. “He ram hi ka ta, he ram chhanchhuak tur hian kei hi ka awm” tih rilru pu tura official-te fuihin an mawhphurhna chu mipuite tan a ni tih hre thar leh turin a chah a ni.
NABARD General Manager Pu R.K.Srivastava chuan Mizoram hmasawnna turin mission pasarih an kalpui tur thu a sawi a. Chungte chu -Mission on Organic Spices, Visit Mizoram Mission, Universal Social Security Coverage Mission, Strengthening Primary Cooperative Credit Societies, My Bamboo My Wealth, Design Your Future leh Spring Rejuvenation and Development tih te a ni a. Heng kawng sariha tha taka hmalak a nih chuan Mizoram economy in hmel thar a hmuh ngei a beisei thu NABARD General Manager hian a sawi a ni.
Agriculture Minister Pu C.Lalrinsanga hian State Focus Paper a tlang zarh nghal a. He State Focus Paper thupui atana thlan chu “Sustainable Agriculture Practices” tih niin he paper hi State Sawrkar Department pawimawh hrang hrang leh Banking Institution te buatsaih a ni. Kum 2019-2010 chhunga State in sector a ngaih pawimawh hmasakte hnena sum hman theih tur duan lawk chu cheng vaibelchhe 1595.27 a ni a, hei hi 2018-19 aiin 20% in a tam zawk a ni. Sawrkar leh Bank-te nena tangkawpa Department pawimawh hrang hrang hnena sum pek chhuahna ah hian NABARD in hmun pawimawh tak a luah a. Lo neih leh thingtlang mite hmasawn theihna tur hai chhuah nan kum tin Potential Link Credit Plans chu district hrang hrang tan a siam thin a, State Focus Paper siam nan district tin PLP-te chu State Level ah khaikhawm thin a ni. State Focus Paper in a tum ber chu sector hrang hrang ten sum an hai luh theihna tura ruhrel changtlung tak an neih theih nan leh chak zawka hma an sawn theihna tura an mamawhte ruahmanna siamsak a ni.
State Credit Seminar-ah hian NABARD Manager Pi H.Lalhmachhuani, NABARD DGM Pu VR Nag leh Pu N.Vikraman, Agriculture Department atangin Pu Pradip Chhetri, NEIDA Co-ordination Pu B.Lalrinkima ten thu an sawi a. I&PR Secretary Pu Sangdingliana, RBI leh Bank hrang hrang aiawhte, sawrkar official leh mi pawimawh dangte he programme-ah hian an tel a ni.
