Vawiin chawhnu khan Pu Lalrinliana Sailo, Speaker, Mizoram Legislative Assembly chuan Rina Indoor Stadium, Khawhaiah  a hawng.

Pu Lalrinliana Sailo chuan kalkhawmte chibai  bukin mahni khua ngeiah khawtlang huapa  an lo hmuak chu  ropui a tih thu a sawi a. Pathian khawngaihna  leh malsawna vanga  tun hun  thleng thei anih thu sawiin, Khawhai khaw  mipui te  thlawpna  leh tawiawm thinnaah  lawm thu a sawi a. Sawrkar tharah thawhhona tha tak a awm a, roreltu fing leh fel tak takte kaihhruainain Mizoram hmasawnna chak taka kalpui tum a ni, a ti. Khawhai khuain Infiamna lama hmasawnna kawnga  bultanna tur Indoor Stadium tha tak a nei thar chu a lawmpui tak zet thu a sawi a. Indoor Stadium thar chu Khawhai khua leh a chhehvel khuaa thangthar ten thiam thil zirna atana hmanga leh  an hlawkpui ngei theihna tura duhsakna hlanin a hawng. 

Indoor Stadium hawnna hun hi Pu C. Rodawla,  VCP Khawhai chuan a kaihruai a. Rev Vanlalthlamuana'n hunserh hmangin Pu Laldawngliana Renthlei, Khawhai VC Secretary-in inlawmna thu a sawi a ni. Vawiina hawn tak Rina Indoor Stadium hi MLA fund, MP fund leh a remchang dangte pawtkhawma sak puitlin a ni a. A dung feet 70 leh avang feet 40 vel, Mizo pa chhiara chhawng khat a lian a ni a. Indoor games hrang hrangte khelh theihna tur bakah a kawtzawlah Volleyball Ground tha tak siam a ni bawk. 

Speaker Pu Lalrinliana Sailo hi Pi ST Lalvensangi, SDO Civil Khawzawl, Dr Lallawmkima, DIPRO Champhai leh Pu Zosangliana Zote, EE  PWD Khawzawl-ten an tawiawm a ni.