National Bank for Agriculture and Rural Development (NABARD), Mizoram Regional Office buatsaih, State Credit Seminar for 2012 - 13 chu vawiin khan State Guest House Conference Hall, Chaltlang-ah neih a ni a, Chief Minister Pu Lal Thanhawla chuan a hmanpui.

Chief Minister chuan Mizoram chu kum 20 chhung rambuai anih avanga state dangte aia nasa taka hmasawnna kawngah a hnufum bik a ni tiin, a economy tundinna kawngah leh hmasawnna ke kan pen ve theih tura agency hrang hrang, NABARD ang ten hma an lakna zarah kan thang chho ve ta zel a, a lawmawm hle a ni a ti a. Mizoram chu hmasawn tura mamawh thil tul tam tak awmte chu a leilungin a nei a ni a ti a. Tuna State Focus Papera tarlante chu official te zirchiang tur leh bawhzui ngaite lo bawhzui tura a hrilh tur thu a sawilang bawk a ni.

Chief Minister chuan Seminar-ah hian member ten sawiho se a tih, thil pawimawh nia a hriatte chu a tarlang a. Mizoram loneitu ten tlangram lo neih an bansan theih nan sum tanpuina, agriculture credit flow chu loneitute chhawr tangkai theih turin zau zawka chhawpchhuah nise a ti a. Sorkar flagship programme NLUP dawngtute pawhin ke an pen chhop zel theih nan hamthatna siam sak se a ti a. Tuna farmers’ club an dinte hi tha a tihpui thu sawilangin, credit and marketing support an siam sakah lawmawm a tihthu a sawi bawk a. Animal and Husbandry scheme hman chungchangah sorkar bultum credit scheme te NABARD in a kalpui chu tha a tiin, chhunzawm zel nise a ti bawk a. Heng bakah self help group hrang hrangte credit support pe chhunzawm a, handloom sector lamah inhawng zau turin a ngen bawk a. Loan rulh chungchangah mipui ten loan an an rulh that theih nan inzirtirna leh inhriattirna tha zawk siam thin se tiin, tuna tuna loan rulh that dan dinhmun 63% chu, rul thaah angaih theih loh a ni a ti.

State Credit Seminar 2012 - 13 hi NABARD in Mizoram tan kum khat lo awm tur zel atana State Focus Paper (SFP) a buatsaih thin sawihona hun atana huaihawt a ni a. Tuna SFP 2012 -13 hi Mizoram district 8 tana Potential Linked Credit Plans a duanlawk, thuneihna semzaia mipui telve theihna tura Plan Document a ni.

Seminar-ah hian NABARD hotulu Pu R.K.Das, General Manager, NABARD in a rawn tel pui a. Sawihona hi Pu D.S.Watwani, Manager, NABARD in a kaihruai a ni.