National Bank for Agriculture and Rural Developmet (NABARD), Mizoram Regional Office buatsaihin State Credit Seminar 2010-2011 chu vawiin khan State Guest House ah neih a ni a. Agriculture Minister Pu H.Liansailova chuan he Seminar hi hmanpuiin State Focus Paper 2010-11 chu a tlangzarh nghal a ni.

 

 

Thu sawiin Pu Liansailova chuan Mizoram sorkarin lo neiha eizawnna leh thingtlang hmasawnna a ngai pawimawh em em a. Kut hnathawktute leh mirethei khaichhuak turin sorkar department te, Bank hrang hrang te leh NGO ten thawh hona tha an neih a pawimawh hle a ni, a ti a. Mizoram sorkar NLUP ruahmanna tarlangin Pu Liansailova chuan hei hian lo neih leh huan siam lamah te, sangha khawi leh ran vulh hna ah te, pangngang khawi leh kut themthiam hna hrang hrang ah te remchanna tam tak a siam dawn a. A hlawhtlinna turin market tha leh rintlak inthlun zawm pui neih te, a buaipuitu sorkar department hrang hrang ten thahnem ngai taka an enkawl leh bank hrang hrang ten sorkar an puibawm that te a pawimawh, a ti bawk a. NER Vision 2020-in hmarchhak bial hmasawnna tura eizawnna hna a ngaih pawimawh deuh deuh, huan siam, pangngang khawi, medicinal plants, sangha khawi etc. te chu Mizoram sorkar-in bawhzui a, tih hlawhtlin a tum tih sawiin heng zawng zawngah hian kut hnathawktu ten hna thawhna tur sum an mamawh ang zat, a hun taka an hmuh theih nan bank leh financial institution hrang hrang ten thingtlang mite chhawr phaka an service an chhawp chhuah a tulin Farmers Club hrang hrang te hnena training pek leh tunlai hmanraw tha chhawp chhuah sak chu ram intodelhna tur atana thil tul a ni, a ti a. Sorkar department te leh bank hotute chu hemi kawngah hian thahnem ngai a, tang rual turin a sawm a ni.

Seminar kaihruaitu Pu P.C.Sahoo, General Manager, NABARD chuan kum 2010-11 chhunga Mizoram tana Bank sum puktir tur ruahman zat (institutional credit support) chu vaibelchhe 306.68 a ni tih sawiin kum 2009-2010 a sum ruahman aiin 30% a a pun thu a tarlang a. Heta tang hian vaibelchhe 65.26 chu Agriculture leh a kaihhnawih eizawnna hna atan niin Non-farm sector tan vaibelchhe 46.49 leh sector ngaih pawimawh dangte tan vaiblechhe 194.93 ruahman a ni, tih a sawi bawk.

Seminar-ah hian NABARD hotute leh Mizoram chhunga Bank hrang hrang hotute bakah sorkar department pawimawhte leh pawl hrang hrang te an tel a. Crop loan leh Kisan Credit Card chungchang te, kut hnathawktute tana loan leh tanpuina pek chungchanga harsatna te leh thawhho na tur chungchang te sawiho a ni a. Pu Diganta Kumar Das chuan State Focus Paper 2010-11 sawifiahna neiin heta hmalakna tur pawimawh deuh deuh te chu agriculture leh a kaihhnawih lamah chuan crop loan, tuikawng siam, horticulture, bawng leh ar vulh lam te niin sector ngaih pawimawh dangte chu micro finance leh financial inclusion lam te a ni tih a tarlang a. Seminar khar nan Pu S.Subba Rao chuan lawmthu a sawi thung a ni.