1968/2024-2025

Dated Kolasib the 9th September 2024: Mizoram Police Battalion hrang hrangte tana buatsaih Chawlhkar thum awh tur State Disaster Response Force Training chu vawiin khan Disaster Management & Rehabilitation Director Pu R Vanrengpuia chuan 1st IR Bn Mualvum ah a hawng.

Hawnna inkhawm ahhian Director chuan Police hna thawh mek laia rikrum thilah mipui tana che chhuak tura Training neih chu phurrit ah ngai lo turin Training tura thlan chhuah Police 30 te a fuih a. Chhiatna a lo thlen hian mipui tlawmngaite chu an tlankhawm thuai a; an pungkhawm mai a, mahse zir thiamna nei lo tan hmun thenkhat chu a hlauhawm a; fimkhur a ngai bawk a, chuvangin zirna mumal tak neih hi a pawimawh a ni a ti.

Training hawnna hi Jt Director (Operation) Pu Lalchunglura’n a kaihruai a. Police te chu thunnunna tha taka awm an nih avangin chhanchhuah hna thawh a chak bik a; Battalion 4 ah Training zawh fel a ni tawh a, hmachhawp a la awm a ni, a ti.

Dy Director Dr Lalrokima Chenkual pawh in thu sawiin kum 2010 atang khan Police mi leh sa 800 hnenah Training pek an ni tawh a; tunah chuan chak lo leh pensiona chhuak an tam tawh a; mi 450 vel chauh Mizoram ah hman theih kan nei a; chuvangin Deptt chuan nikum September thla atang khan mi 188 dang Training pek belh turin a kalpui a ni, a ti.

Training chhungin Quick Response Team leh Adventure Sports lama tawn hriat nei ten ni 3 an zirtir hnu-ah Nation Disaster Response Force in an zirtir chhunzawm dawn a ni. Theory leh Practical hmanga zirtirna pek an ni ang.

Rikrum thila chhanchhuah dan zirna ah hian Hliam sawngbawl dan te; tanpui ngai tanpui dan te; Damdawi hman dan te leh hmanrua hman dan te an zir ang.