Disaster Management and Rehabilitation (DM&R) Department buatsaihin vawiin khan Central Training Institute (CTI) Sesawng-ah State Disaster Response Force (SDRF) batch hmasa ber te tana training hawnna hun an hmang. Pu Rohmingliana, Secretary, DM&R chu khuallian niin training hi a hawng a ni.

Pu Rohmingliana chuan  chhiatrupna (natural disaster) lirnghing, tuilian, kangmei leh a dangte hi India ram hmun hrang hrang ah a thlen fo thu leh, Mizoram ah pawh thleng thei reng a nih thu a sawi a. Sorkar laipui chuan he chhiatna lo thleng thei laka mipuite tanpui turin SDRF te hi a din a, Mizoramah training hmasa ber neih  a ni chu lawmawm a tih thu leh a pawimawhzia hria a training nei tur te chu uluk tak leh taima tak a zir thiam ngei turin a fuih a ni.

SDRF te training pe tur hian Ist Battalion NDRF (National Disaster Response Force) Guwahati atangin thlan bik te an lokal a.Training hi ni 24 May, 2010 atanga ni 19 June 2010 chhunga zawh hman tur a ruahman a ni. SDRF first batch atan hian Ist Batallion MAP leh IInd Battalion MAP atangin mi 25 ve ve thlan chhuah an ni.

He inkhawm hi Pu V Saptawna, Director DM&R chuan a kaihruai a, Pu Dominic Lalhmangaiha, State Project Officer, Commandant CP Saxena Ist Battalion NDRF Guwahati leh Lalrengpuia, Commandant CTI  ten thusawina hun an hmang bawk a. Deputy Commandant Ist Bn. NDRF in Course kalpui dan tur tlangpui sawina hun a hmang nghal a ni.