Vawiin khan State Guest House ah Standing Committee of All India State Election Commissioners chu an thukhawm. He meeting hi Pi Renu Sahni Dhar, IAS (Rtd),Chairman, Standing Committee in a kaihruai a, Andhra Pradesh, Madhya Pradesh, West Bengal, Karnataka, Rajasthan leh Mizoram a State Election Commissioner leh Special Invitee Dr Hrusikesh Panda, IAS, Addl Secretary, Ministry of Panchayati Raj te an tel.

Tun tum meeting hi Mizoram in a thlen vawikhatna niin kum khatah meeting vawihnih neih thin a ni a, tun thleng hian chutiang intawhkhawmna chu vawi 16 lai an hmang tawh nghe a ni. Vawiin meeting ah hian Official atanga agenda pawimawh tak tak bakah state hrang hrang Election Commissioners in thu an put lut ngaihtuah ho a ni a. Ministry of Urban Development atangin ngaihtuah tur pakhat chhawpchhuah a ni bawk, Mizoram SEC in ngaihtuah tur a thlen SEC building hran neih rawt chungchang pawh member dangte hian thlawp in State sawrkar hnenah a tul anga thlen an remtih pui a ni. An thu ngaihtuah zinga langsar dang pakhat chu Panchayati Raj Ministry thu thlen- Panchayati Raj inthlanna ah pianphunga rualbanlo a bikin khaw hmu fiah lo tan pawh inthlan chuh ve phalsak rawtna pawh a tel.

Pu C.Ropianga, IAS (Rtd) Mizoram State Election Commissioner chuan inlawmna thu sawiin hetiang ram pum huap Committee pawimawh tak hmarchhak state hmun kilkhawr bera nghah theih anih avangin lawmthu a hrilh a, Mizoram an cham chhunga hun tha tak hmang turin a duhsakna a hlan a ni.

Mizoram Governor Pu Vakkom Purushothaman chuan he meeting a lo tel te State Election Commissioners te hi vawiin khan Raj Bhavan ah chhun chaw a ei pui a. An pual hian Cultural Show leh zan riah Pu C. Ropianga, IAS (Rtd) chuan State Guest House ah a buatsaih sak dawn a ni.