Vawiin  Feb.6,2009 dar 2 khan Mizoram State Emergency Centre-cum- Directorate Extension Building chu Chawnpui Veng, Aizawlah Pu N.K.Chakma, MOS-in a hawng. He in hawnna inkhawm hi Pi Lalzarmawii, Joint Director-in kaihruaiah hian Pu N.K.Chakma chuan thusawiin, “Disaster Management & Rehabilitation Department hna hi Pathian hna, mi mangangte tanpui a ni a, a pawimawh hle. Chuvangin thawktu zawng zawngte pawh mi dang hmangaihna nen taima taka thawk tùrin ka ngen che u a ni,” a ti. Pu Nihar Kanti chuan, ` tumahin kan hma lam hun sawi lawk thei kan awm loh avangin DMR hi mitin nghawng leh tanpuitu a ni, thawktuten inpek a tul takzet a ni,’ tih a sawi bawk.

Pu K.Riachho IAS, Secretary, DMR pawhin welcome speech a sawinaah he Department hnathawh dan thenkhat tarlangin, Mizorama chhiatna hrang hrang thleng thin tanpuina hi nasa taka thawh a nih dan leh, Department felfai ber a nih hial a rin thu a sawi. Pu Rohlira, Suptdt-in  in sak dan report pein, he in sak nan hian cheng nuai 45.53 hman a ni tih a sawi. Pi Rita L.Pachuau-in lawmthu a sawi hnuin inkhawm titawpin zanriah kilho nghâl a ni.