Vawiin khan Rural Development Minister Pu R. Lazirliana hovin Secretariat Conference Hall-ah State Employment Guarantee Council (SEGC) chu kumina a vawikhatna atan an thukhawm. He meeting, Mizorama MGNREGA kalpui dan ngaihtuahnaah hian Parliamentary Secretary Lt. Col (Rtd.) Z.S. Zuala, Chief Secretary Pi L. Tochhong leh member dangte bakah Department hrang hrang atanga sawm bikte an tel a ni.

Vawiin SEGC meeting-ah hian kum hmasa lama an thil rel tawhte bawhzui dan thlirletna hun an neih bakah hmathar lak dan tur te an sawiho a. Chung zingah chuan MGNREGA hnuaia hnathawhte endik leh vil tura State Quality Monitoring Unit din te, hnathawh dan puangzar tura Information Board din chungchang leh job card dil tur ten EPIC an neih a tul thu te a tel a ni.

Sorkar laipui chuan MGNREGA hnuaia mihring tha 60% chu department dangte hmalakna atan a tangkai thei dawna a hriat avangin kum 2014-2015 hi MGNREGA hnuaiah “Year of Convergence”-ah a lo puang tawh a. Chumi bawhzuina chuan kumin March ni 19-a State Level Convergence Workshop neihah department pali (4) thlan te nen thawhhona (convergence) bul tan a ni a. Vawiin meeting-ah hian Department – Soil & Water Conservation Department (rubber plantation atan), Fisheries Department, Horticulture Department leh Sericulture Department-te nen an thawhhona an kalpui chhoh dan te sawiho a ni.

Nakkum 2015-2016 hian Department tam zawk nen thawh ho tum a ni bawk a. Vawiin meeting hian heng department hrang hrang-te nen hian hmalakho a rem leh rem lohte a ngaihtuah bawk.