Vawiin khan Mizoram State Geological Programme Board Meeting vawi 18-na chu Aijal Club-ah MP (Lok Sabha) Pu CL Ruala hovin neih a ni.

Pu CL Ruala chuan Mizoram chu State te tak te nimah se leilung hausakna tam tak haichhuah tur, a bik takin Oil leh Natural Gas-ah phei chuan a ngah hle beisei a ni, a ti. Ram chhung leh ram pawn atangin tuialhthei zawngtu Agency lian tak tak 9 in hna an thawk mek a, tun dinhmunah State pum hmun 58.9% vel an tuam tawh a ni tiin amah ngeiin ONGC hnathawhna hmun Meidum a tlawh tawh thu leh beiseina sang tak a neih thu a sawi a. Tuialhthei leh Gas zawnna hna piah lamah Hydro Power leh leilung hausakna dang haichhuahna kawngah he Meeting hian hmachhawp a neih hriain an thiamna leh thil tawn tawh te hmanga theihtawp chhuaha Mizorama cheng te dinhmun chawikang turin a fuih a ni.

Geology &Mineral Resources Director Pu Nikhil Kumar, IAS kaihhruai meeting-ah hian ONGC, Geological Survey of India leh Directorate of Geology & Mineral Resources hnathawh dan tlangpui an thlir a, chipchiar takin thil pawimawh chi hrang hrang an sawiho a ni.