Vawiin khan State Information Commissioner Dr.C.Lalzirliana chuan Mizoram Departmental Officers Association (MDOA) General Meeting vawi -11na Taxation Department Auditorium-ah a hmanpui.

Dr.C.Lalzirliana chuan MDOA hmalakna fakin pawl chak tak, thawhpuite hmakhaw ngaitu an ni, a ti a. Service a harsatna tawk departmental officer-te an lo tanpui tawh thin angin tha thlah hauh lova tanpui zel turin a chah a. MDOA chu ama service atan ngei pawh malsawmna an nihzia sawiin he pawl chak tak chhawr tangkai bertute zingah a tel thu State Information Commissioner hian a sawi a ni.

MDOA-ah hian Department  hrang hrang 29 zet an tel a, member hi 500 chuang an nei a ni. An pawl hian Mizoram sawrkar hnuaia officer-ten hamthatna inang tlang an neih theih nan te leh promotion hmu tura service rei zawng inchen lo lutuk siam thatna tur te in hma an la a. Vawiin rorel inkhawmah hian agenda pali an sawi hovin chungte chu - District Officer-te PAR-a reporting officer hi Department hotute ni thin tawh rawh se, tih te; Departmental Officer atang hian Secretary Level thlen ve theih dan zawn ni rawh se, tih te; sawrkar pakhat hnuaia officer-ten promotion chungchanga hamthatna inang kan neih theih nan hmalak ni rawh se, tih leh MDOA constitution en nawn te a tel a ni.

Kum 2019-2021 term chelhtu tur MDOA Office Bearers inthlan neih nghal niin Pu Lalchuailova, Art and Culture Department; Dr JT Vanlalngheta, Labour Employment Skill Development and Entrepreneurship Department; C.Vanlalchhuana, Taxation Department; PB Lianthangpuii, I&PR Department; Laltleipuii, Fisheries Department; C.Lalnunmawia, Mizoram Home Guards & Civil Defense; Er R.Lalrammawia, Transport Department leh Pi Lalsangpuii, Commerce and Industries Department-te thlan chhuah an ni.

Vawiin Programme hi MDOA President Pu Lalchuailova’n a kaihruai a. Vice President Dr JT Vanlalngheta leh Jt. Secretary Er R.Lalrammawia ten thu an sawi bakah Secretary Pu C.Vanlalchhuana’n an pawl hmalakna a report bawk a ni.