No.6858/2020-2021

Support to State Extesion Programme for Extension Reforms Scheme, ATMA Mizoram hnuaia State Level Best Farmer Award 2019-2020 chu Agriculture leh a zawmpui peng eizawnna hnathawktu tha thlan chhuah mi 5 - 1)Pu F.C Vahnei, Chakhei, Siaha District; 2) Pu Laldanga Thingsulthliah Tlangnuam, Aizawl District; 3)Pi Biakdawli, Armed Veng, Aizawl District; 4)Pu Vanlalliana, Leisang Veng, Serchhip, Serchhip District; leh 5) Pu P.C.Sangawia, Chekawn, Serchhip District te hnenah vawiin khan Agriculture Minister Pu C.Lalrinsanga’n a office ah a hlan a. He Award hian citation leh sumfai cheng nuai 1 a keng tel a ni.

Pu Rinsanga chuan thu sawiin Best Farmer Award-in a tum bul ber chu loneitu mimal titha te chawimawina aiin ei leh bara ramin intodelhna kawng a zawh theih nan intihsiakna tha buatsaih a ni, a ti a. He Award hnuaia Agriculture, Horticulture, AH&Vety, Sericulture leh Fishery eizawnna te chu state economy thanna tur atana sector pawimawh ber ber te an ni, a ti a. Ei leh bara Mizoram a intodelh loh vanga thenawm ram leh state dangte thar chhuah lakluh nan thla tin sum a luan chhuah nasat zia leh ram economy chawikang turin ei leh bara intodelhna kawng zawh a, thar chhuah tihpun a pawimawh zia a sawi a. Buh leh thlai dang chu sawi lohvin, panhnah ringawt ah pawh thla tina Mizoramin sum a senral hi a nasa hle a ni, a ti. State dangah thla tin sing hnih khat hlawh tura thalai rualte intirh chhuah aiin a let tam taka hlawk zawk, ei leh bara ram intodelhna tur ni bawk si Mizoram chhungah hian Agriculture leh a zawmpui peng eizawnna ah thlalai te tan hna thawh tur a tam a ni, a ti a. Hei hi Chief Minister pawhin a vei thu leh hemi atan hian tih tak zeta hma lak chhoh tum a nih thu a tarlang a. Mizoram sum lakluh tipung tur leh rang taka a luang chhuak leh tur dan beh nan kawng hrang hrangin ei leh bara intodelhna hi Agriculture department leh Cooperation Department pawhin nasa takin hma a la dawn tih a sawi a. Award dawngtu te chu an thawhrimna ah fakin an hlawhtlinna chu a lawmpui thu a sawi a. Kuthnathawktu dang te entawn atan leh ram hmasawn nan nasa taka tan la chhunzawm zel turin a fuih bawk a ni.

State Level Best Farmer Award 2019-2020 hi heng Sector 5 - Agriculture, Horticulture, AH&Vety, Fisheries, Sericulture a eizawngtu te an ni a. Award dawng tur thlanna ah hian ATMA chuan tehfung siamsa neiin chumi hmang chuan official ten an hnathawhna hmun te tlawhin an hmalakna te a takin an endik a, anmahni kawmna te an neih hnuah thlan chhuah an ni. 

Award hlanna inkhawm hi Dr.Saithantluanga State Nodal Officer(ATMA) & Director, SAMETI in a kaihruai a. Tunlai thiamna hmanga agriculture eizawnna tih hmasawnna tur leh loneitute dinhmun chawikanna tura Agriculture Department hnuaia hmalakna hrang hrang te tarlangin Mizoram leilunga buh leh thlai thar te a ram neitu hming chawia neitu nihna humhalh tura GI Mapping leh coding tih mek te, Agriculture leh allied sector eizawnna atana hma lak nan, mi hausa te ram hman hawhna tur te pawh sawrkarin a buaipui chho mek tih a sawi a. Dr. B.Lalrosiami Khuhly, Faculty (AEM), SAMETI Mizoram in Award thlanna chungchang report pein Dr.Angela L.Renthlei, State Coordinator, ATMA, Mizoramin lawmthu sawiin hun hnung a khar a ni.