4465/2025-2026

Aizawl, 13th February, 2026 : Vawiin khan SCERT, Mizoram, Samagra Shiksha, Mizoram, NCERT leh Pandit Sunderlal Sharmna Central Institute of Vocational Education (PSSCIVE), Bhopal-te tangkawpin an huaihawt "State Level Capacity Building Workshop on Career Handbooks & My Career Adviser App" chu hman a ni.

He nileng awh workshop-ah hian DEO leh SDEO te, DIET Principal-te lehDIET lecturer-te an tel a. He programme hawnna inkhawm hi Pi Caroline Zoramthangi, Director, SCERT chuan kaihruaiin, Pu David Lalthantluanga, IAS, Secretary, School Education Department chu khuallian a ni.

He programme hawnna inkhawmah hian Dr. Lalduhawmi Thomte, Joint Director, SCERT chuan Career Guidance chungchanga SCERT hmalak tawhna te report in, he programme in a tumte a sawifiah.

Dr. Lalduhawmi Thomte chuan zirlaiten nakin lawka eizawnna an neih theihna tur atana career awareness campaignte, career exhibitionte, career counsellingte an lo neih thin thu a sawi a. NEP 2020 in naupangten eizawnna kawng an zawh tanna tur atan leh textbook pawn lama thiamna an zirtheihna tura ruahmanna "10 Bagless Days" chu hlawhtling taka hman mek niin, chumi atana hman tur chuan India rama a hmasa ber ni turin "Nunkawng Sialna Bu" SCERT, Mizoram siam chu August 2024 atanga hman tan a nih thu a sawi. Hetiang guideline hi PSSCIVE, Bhopal-in a tihchhuah ve tak hnuin, Nunkawng Sialna Bu chu SCERT chuan ennawn lehin, June 2025 khan revised and enlarged edition a tichhuak leh a ni a ti. Tuna zirlai ni mekte hi nakin lawka eizawnna tling tur hnathawk thei tura buatsaih lawk hi a pawimawhzia thu a sawi bawk.

Pu David Lalthantluanga, IAS, Secretary, School Education Department chuan 500 Career Cards leh zirlaite hna zawnna atana pui theitu tur Mobile App chhawpchhuah a ni chu lawmawm a tih thu sawiin, an hun laite ngaihtuahin tun lai zirlaite chu an vanneih tawh zia thu a sawi.

He workshop hi Dr. Vinay Swarup Mehrotra, Professor, PSSCIVE, Bhopal- in a rawn hmanpui a, a hawnna inkhawmah hian NCERT leh PSSCIVE in career guidance atana 500 Career Cards leh My Career Adviser App an siam chhan leh tangkai taka hmang tur chuan zirlaite leh zirtirtute mai bakah an nu leh paten a hman dan leh a nihna chiang taka an hriatve a pawimawihzia thu a sawi.

Pu C. Lalthanzira, SPD, Samagra Shiksha, Mizoram pawhin he hawnna inkhawmah hian thu tawi a sawi bawk.

Pu Vanlalrosiama, MF&AS, Addl. SPD, Samagra Shiksha chuan kalkhawmte hnenah lawmthu sawiin he inkhawm hi khar a ni.