4465/2025-2026

Dated Aizawl, 13th February 2026: Vawiin khan Mizoram State Cancer Institute chuan, India hmarchhaka Cancer Doctor rual inzawmkhawm pawl, Association of Oncologists of Northeast India (AONEI), Annual Conference vawi 21-na hawnna inkhawm, Mc Cabe Hall, Aijal Club-ah an buatsaih a, Health & Family Welfare Minister Pi Lalrinpuii’n a hawng. He hunah hian India ram hmun hrang hrang atangin Cancer lama mi thiam rualte an kalkhawm a ni.

Thu sawiin Health Minister chuan, Mizoram chu India rama cancer vei tamna hmun a nih thu leh National Cancer Registry Programme hnuaia report hrang hrangah tarlan a nih danin Mizoram leh hmarchhak state-te chu chawkawng cancer, chuap, hnute leh chhul hmawr cancer-te hluarna hmun a nih thu a sawi a. ‘Hetiang a nih mek laia India rama cancer doctor rualte intawhkhawmna hun Mizoramin a thleng chu cancer dona kawngah thil lawmawm tak a ni’ a ti a, Mizorama damlo leh a bik takin cancer natna veite tan rah duhawm tak chhuah ngei se a duh thu a sawi. Mizorama cancer hluar lutuk tih ziaawmna turin theihtawpa hma lak a nih thu sawiin, Mizoram sawrkar leh JICA tangdunin Mizoram State Super-Specialty Cancer & Research Centre, Zemabawka an din tur pawh, hna thawh tan a nih tawh thu a sawi a, hemi hnuaiah hian 700 Cr project, bone marrow transplant tih theihna tur te,  Nuclear Medicine Facility hrang hrang, PET Scan leh cancer test-na chi hrang hrangte tih theihna turte pawh dah a nih tur thu a sawi bawk. 

Minister chuan nasa lehzuala zirchianna neih chu Mizoram tan thil pawimawh tak a nih thu sawiin AONEI thil tum hrang hrang - cancer leh a enkawlna medical lama hriatna inhrilh darh tawn te, India hmarchhaka cancer enkawlna tih changtlun leh intluktlanna a awm theih nana hma lak te, cancer veite enkawlnaa medical line hrang hrang leh hmarchhak state hrang hrangte inkara thawh hona ṭha siamte chu Mizoram tan thil hlu tak a nih tur thu a sawi a. He pawl kaltlang hian hriatna leh hmasawnna inhrilhtawn zung zung thin a nih thu leh tih dan tha apiangte pawh member-te inzirtir tawn zel tur a nih thu sawiin, he hun hmanga kalkhawm doctor rualte leh damdawi lama mi thiamte chu khawtlâng leh mipuite tan, an thiamna leh theihnate a hlawk thei ang bera hman a nih theih nan hlawk taka conference hmang theuh turin duhsakna a hlan nghal bawk a ni.

AONEI conference hi kum tinin India hmarchhak state hrang hrangah neih ṭhin a ni a, a vawi 21-na chu kumin hian Mizoram State Cancer Institute-in thlengin, February ni 13 – 15, 2026 thleng a awh dawn a; hemi ni thum chhung hian cancer chungchang zir hona leh thupui (topic) hrang hranga then, sawi honate neih a ni dawn a ni. He conference chhim tur hian India ram hmun hrang hrang atangin member za chuang an kal khawm a, India ram hmunpui zawka cancer chungchanga thiamna ril tak tak nei - Dr Pankaj Chaturvedi, Director, Advanced Centre for Treatment, Research and Education in Cancer (ACTREC), Mumbai te, Dr. Dodul Mondal, Radiation Oncologist, Max Hospital, Delhi te, Dr Mohammed Imaduddin, Surgical Oncologist, Cion Cancer Clinics, Hyderabad te leh Dr Harikrishna Kovilapu, Medical Oncologist, CMC, Vellore-te pawh lo kalin thu sawina hunte an nei bawk dawn a ni.

AONEI Annual Conference hawnna inkhawmah hian Dr. B. Zothankima, Head of Department, Department of Radiation Oncology chuan kalkhawmte lawmna thu a sawi a, AONEI President Dr. Jina Bhattacharya te, AONEI Secretary Dr. Kaberi Kakati leh ACTREC Director Dr. Pankaj Chaturvedi te pawhin thu an sawi bawk a; Mizoram State Cancer Institute Director Dr. Jeremy L. Pautu chuan lawm thu sawiin hun hi a khar a ni.

Association of Oncologists of Northeast India (AONEI) hi kum 2004 khan Dr C. Bhuyan (Medical Oncologist) leh Dr Judita Syiemlieh (Radiation Oncologist) ten, cancer doctor dang 20 velte nen tang hoa an din a ni a. India hmarchhaka oncologist-te mai bakah, doctor hrang hrang - surgeon, gynecologists, head and neck (ENT) doctor, radiologist, medicine, pathologist, microbiologist, palliative medicine leh a dangte nen inthlunzawmin an thawk ho bawk a ni.