4854/2024-2025

Aizawl, the 27th March, 2025: Mizoram Science, Technology & Innovation Council (MISTIC), Directorate of Science & Technology leh Planning & Programme Implementation Department hmalaknain zopa kutthemthiamna lam hawi leh thil thar siam chhuah lama tui mite tan vawiin khan Innovation Facility Centre (IFC), MINECO-ah 'State Level Chief Minister’s Inventors Challenge' buatsaih a. Mahni kutchhuak ngaihhlut nachang kan hriata, mipui mamawh khawl man tlawm leh tangkai tak takte siam chhuah a nih theih nan he intihsiakna hi buatsaih niin, a tithate hnenah Handholding support (Seed Fund) pek a ni ang.

State-Level inelna khuhhawnna hun hi vawiin chawhma dar 10:30 ah khan neih niin, Dr. K.C. Lalmalsawmzauva, Adviser to Chief Minister (Handholding) chu khuallian a ni a, Er. H. Lalsawmliana, Chief Scientific Officer & Member Secretary, Mizoram Science, Technology & Innovation Council chuan inkhawm hi a kaihruai a ni.

Khuallian Dr. K.C. Lalmalsawmzauva chuan ram hmasawnna atana Science & Technology pawimawhzia sawiin, khawvel changkang zawk kan tihte pawh an ramin hma a sawn theih nana a phena thawktu tak takte chu hetiang thil thar ngaihtuah chhuak thintu mi tlemte te hi an ni a, Mizoram mamawh thil siam chhuak tur pawh hian Mizote ngei hi kan tha ber a ni, a ti a. Mizoram mamawh nia a hriat thil pawimawh hrang hrangte sawiin, Mizoram mil thil tangkai tak tak siam chhuak zel turin Mizo Innovator kalkhawmte a fuih a. Mizoramin Technology Innovation lama ke a pen chho mek zel chu lawmawm a tih thu a sawi bawk.

He hunah hian Planning & Programme Implementation Department hnuaia Research & Development Board-te, Mizoram Remote Sensing Application Centre, Mizoram Science Centre, Directorate of Science & Technology leh Directorate of Economics & Statistics-a mi pawimawh tak takte an kalkhawm a ni.

Intihsiakna hi Hardware leh Software Category-ahte then niin mizo mipui, a duh apiangte tana tel theihna tur ‘Open Category’ leh College level zirlaite tan bika siam ‘Higher Educational Institutions Category’ ahte then a ni a; State-Level Chief Minister’s Inventors Challenge-ah hian District hrang hrang atangin mi sawmthum pariatte an intihsiak a ni.

Chief Minister’s Inventors Challenge hi Mizoram Bana Kaih (Handholding) Scheme hrang hrang zinga pakhat niin, March ni 11-17, 2025 chhung khan District level-ah neih a lo ni tawh a, chuta tithate chu State level-ah hian an inel leh a ni. He intihsiakna result hi naktuk March ni 28, 2025 hian Vanapa Hall-ah Chief Minister-in a puang dawn a ni.