Vawiin chawhma khan Chief Secretary's Conference Room, New Secretariat ah State Level Committee for Standardization, Quality Control and Quality Systems chu an chairman Chief Secretary Pu Arvind Ray, IAS hovin an thukhawm.

Chief Secretary Pu Arvind Ray, IAS chuan ram chhunga thil siam chhuahte leh ram pawn atanga thil hrang hrang lakluh te chu a thain a rintlak em tih kan hriatchian a tul a ni tiin BIS (Bureau of Indian Standards) pawimawhna sawrkar hnathawk leh mipuiin kan hriat a, inhrilhriatna neih tam a tul a ni, a ti a. BIS pawimawhna hriatna chuan quality tha leh rintlak lehzual hmanna a thlen dawn a ni, a ti.

Meeting-ah chuan bungrua leh hmanrua lakluhah BIS chhinchhiahna (ISI mark) awm chiah lalut tura tan lak a ngaih thu sawiho a ni a. Department hrang hrang ten BIS chhinchhiahna (ISI mark) leh BIS pawimawhna an hriat theih nan training emaw inhrilhhriatna hun buatsaih a tul thu sawiho a ni. Committee chuan Koinonia Water Plant chu member thar ni turin a pawm a. Ram pawn atanga thil lakluh leh ram chhunga BIS chhinchhiahna awmna reng reng a tha tawk lo emaw a rintlak lo a nih chuan BIS office hnai berah sawiselna a thehluh theih thu tarlan niin tun dinhmunah hian Koinonia Water Plant, Mizoram Ispat Industries leh Zoram Beverages ten BIS chhinchhiahna an neih tawh thu meeting-ah hian tarlan a ni a.

 Bureau Of Standards (BIS), hi ramchhunga thilsiamchhuah leh hnathawh dan tur dinhmun leh tehfung (standard ) ruahmantu ber a ni a. BIS aiawh hian Pu Amit Roy, Scientist-F & Head BIS Guwahati leh Pu Vishnu Gupta, Deputy Director General, BIS Kolkata te an tel a ni.

Vawiin hi Committee thutkhawm vawi sarihna niin Meeting-ah hian FCS&CA, PWD, P&E, PHE, H&FW, Commerce & Industries, Koinonia Water Plant, Legal Metrology aiawhte an tel a ni.