Vawiin khan Chief Minister Pu Lal Thanhawla chuan CM's Banquet Hall-ah "World No Tobacco Month" chu hawngin, hemi rual hian vaihhlo tellohna infiamna khawvel Mizorama siam tura hmalakna, "Tobacco Free Sports Campaign" chu Chief Minister hian a tlangzarh nghal a ni. He programme hi Mizoram State Olympic Association, Indian Society on Tobacco & Health, Mizoram Chapter leh Mizoram State Tobacco Control Society tangkawpin an buatsaih a ni.

Chief Minister Pu Lal Thanhawla, Mizoram State Olympic Association Chairman ni bawk chuan infiamna khawvelah Mizoramin hma a sawn zel a, International level inelna thleng pha a medal la thei infiammi chhuanawm tak tak an awm chhoh a, chung hlawhtlinna tithuanawp theitu pakhat chu hriselna ngaihpawimawh tawk loh leh nun uluk nachang hriat loh a nih thu avangin "Tobacco Free Sports" nei tura hmalakna chu a pawimawh thu leh a hlawhtlin ngei a duh thu a sawi a. Chief Minister chuan Mizoramah Sports lamah chuan infiammite chu midang tan, naupang te te tan thlenga an entawn leh mi mit fukna an nih avangin an career atana an invawn a pawimawh piah lamah midang tan entawntlak an nih a pawimawh thu a sawi a. Chutiang bawk chuan anmahni enkawltute, officials leh administration lama awm te pawh player-te tana entawntlak an nih a pawimawh thu a sawi.

World Health Organization (WHO) report atanga a lan dan in ruihhlo hrang hrang avanga thihna hrang hrang thleng aiin vaihhlo zuk leh hmuam avanga thi khawvelah an tam zawk thu tarlangin, Mizo zingah zuk leh hmuam in hriselna a tihchhiat nasat theih zia hi inhrilhhriat belh kan la ngai hle a ni, a ti a. Chutihrual chuan thahnemngaite hmalakna azarah hma kan sawn hret hret tih a lang a, a lawmawm hle a ni, a ti. Ziaktu pakhatin Mizote chungchang a sawi naa "dam duh si, nun uluk peih silo" tia a ziah chu ngaihpawimawh deuh a nih thu tarlangin, dam rei leh hrisel duh tan chuan ei leh in lamah pawh a tui tui ringawt ni lovin, a hrisel zawk ei leh in nachang hriat a ngai a ni, a ti a. Vawiina kalkahwmte chu hun hlawkthlak tak an hman a, an hma hun zel turah pawh Tobacco Free Sports hmalakna hlawhtlinna leh tihlawhtlingtu an nih chhunzawm a duhsak thu leh, vaihlo lak fihlim tura midang hrilhchhawngtu ni thei turin kalkhawmte chu a chah a ni.

Pi Lal Riliani, President, Indian Society on Tobacco & Health, Mizoram chuan he hunah thu sawi bawkin, vaihlo leh a kaihhnawih zuk leh hmuam chi te chu "gateway substance", ruihhlo thalo tak tak tihna kawng hawngtu an nih thu a sawi a; ram changkang apiangin zuk leh hmuam an do nasa in, nunna leh hriselna a tihchhiat zia chu hre mah ila ngaihmawh leh zual kan ngai a ni, a ti. Kumin World No Tobacco Day chuan vaihlo leh lung natna inkungkaihna chu thupuiah a neih tur thu tarlangin, lung natna tan a thatlohna leh, infiammi te tan phei chuan vaihlo zuk leh hmuam chu an hriselna leh career tan a hlauhawm zual zia te a sawi a ni.

Vawiin Programme hi thuang hnih a then niin, Pu C. Laltlanthanga, Secretary, Mizoram State Sports Council chuan hun a kaihruai a. Dr. Jane Ralte, State Nodal Officer, National Tobacco Control Programme, Mizoram "Tobacco Free Sports" chungchang leh hmalak dan tur sawina hun a hmang a, chawhma hun hi Pu Lallianthuama, United Sports Association of Mizoram (USAM) chuan lawmthu sawiin a khar a; Chawhnu lamah workshop neih chhunzawm a ni. Vawiin programme-ah hian Mizorama sports association hrang hrang atangin infiammite an tel a ni.

Global Adult Tobacco Survey (GATS) 2016-17 a lan danin India state hrang hrang vaihlo hman uar dan khaikhin naah Mizoram chu 58.7% niin, pahnihna a ni a. Pakhatna chu Tripura a ni. GATS report 2010 ah khan Mizoram chu India Rama vaihlo hman tamna ber a ni.