Vawiin hian Serchhip DC Conference Hall ah Mizoram Flagship Programme, New Economic Development Policy (NEDP) hnuaia hmalakna pakhat, Mizoram Kailawn, 2018 chungchang inhrilhhriatna hun hman a ni. 

He hun Pu Chuauhnuna, Addl. DC kaihhruaiah hian Entreprenuership Development Scheme (EDS) hnuaia Master Trainer Dr. Lalbiakzuali chuan NEDP hnuaia Entreprenuership Development Scheme chungchang leh kan ramin entrepreneur (Mi suang tak = a taka chang thei suangtuahna tha nei) tha a mamawh dan te, mitin tan hetiang mi a nih theih dan leh, chutiang mi ni tura thil pawimawh hrang hrangte a sawifiah a. Chumi hnuah Pi. Lalrinngheti Sangsiama, Mizoram Consultancy Group chuan he hmalakna kal zela Mizoram Kailawn (Business Plan Contest) 2018 chungchang chipchiar sawina nei ve lehin, a tel duhte tana tel ve dan pawh a lem nena entirin a sawifiah nghal a ni. Tin, he hunah hian Pu. Lalsiamthara, Serchhip, Mizoram Kailawn 2017 a pakhatna la tu pawhin EDS hnuaia training hrang hrang an neih dan leh a hlawkpui dan te sawina hun a nei bawk. 

Mizoram mi tupawh, kum 18 chunglam sumdawnna emaw thil siamchhuahna thar remchang hria, a taka chang ngei tur eizawnna/sumdawnna suangtuah chhuak thiam te tan kuminah hian intihsiakna (Business Plan Contest) Mizoram Kailawn buatsaih leh mek a ni a. He intihsiakna hi May ni 10 thleng thehluh theih niin internet www.mizoramkailawn.org kaltlanga thehluh tur a ni a, May ni 23 ah result puan a ni ang. A thehlut zinga a titha zualte thlan chhuah an ni anga, chung mite chu June 11-15 chhung uluk taka training pek zui niin an ruahmanna te a taka a chan ngei theih dan tur mithiam zawkten an zirtir/zirpui anga. Chumi hnuah an tihthat dan a zirin Entreprenuership Summit, 2018 ah lawmman pawh pek an ni leh dawn a ni. Tun tum Mizoram Kailawn atan hian lawmman Rs. 10 lakh dah ani. 

Vawiina he programme inhrilhhriatnaah hian zirlai naupangte, Self Help Group hrang hrang member te, Chanchinbumite, sawrkar hnathawk leh midang engemawzatte an tel a a ni.