Vawiin chawhma khan Chief Secretary's Conference Room, Mizoram New Capital Complex-(MINECO)-ah State Level Committee for Standardization, Quality Control and Quality Systems chu an chairman Chief Secretary Pu Lalnunmawia Chuaungo, IAS hovin an thukhawm.

Chief Secretary Pu Lalnunmawia Chuaungo chuan ram chhunga thil siam chhuah chi hrang hrang te leh ram pawn atanga mamawh kan chawk luh te hi quality tha a ni em, mihring hriselna atan a him tawk em tih te endik a tul a. BIS (Bureau of Indian Standards)-te chu sawrkar laipuia Ministry of Consumer Affairs, Food & Public Distribution hnuaia tehfung (standard) siamtu an ni a, heng an tehfung hman mek zawm ve hi mipui (consumer)-te hlawkna leh himna a ni, a ti.

BIS Certification Marks Scheme hnuaiah hian product chi hrang hrangah Indian Standard chi 1100 an duang chhuak tawh a, ram pumah product hrang hrang tan license 34,500 an pe chhuak. Product zawng zawngah BIS certificate neih ngei ngei ngai, Danin a bituk leh phut chi 136 a awm a, a bak chu a siamtute duhthlanna a ni thung. North East ah hian Product Certification Scheme hnuaiah licence 564 pek chhuah a ni a, Mizoramah chuan pawl hrang hrang panga hnenah licence 6 pekchhuah a ni. Chungte chu Koinonia Water Plant, Mizoram Ispat Industries Aizawl leh Lengte, Amawii Packaged Drinking Water, VLH Industries leh Oasis Food Industry te an ni. Mizoram chhunga thil siam chhuah quality a that zawk nan leh a leitu mipui (consumer)-te him zawk nan BIS certificate hi uar leh zual a neih tul an tih thu meeting-ah hian tarlan a ni.

Service Quality Management System Certification atan BIS chuan IS 15700 a duang a, Mizoram chhunga Government Department hrang hrangte pawhin hei hi nei thei se tha an tih thu te, Management System Certification te pawh sawrkar department te, industry leh pawl te, bakah district pawhin a neih theih thu tarlan a ni a. Sawrkar sum senga thil siam chhuah leh hmasawnna ruhrel din mekah leh la din tura hman atan bungrua reng reng ISI mark nei thlap hman ni se, tiin meeting chuan a rel bawk a ni.  Standardization, statistical quality control, management system certification, food safety management system leh occupational health and safety management system chungchangah training duh tan BIS chuan National Institute of Training for Standardization and Quality Management (NITS) chu Noida-ah a nei a, sawrkar hnathawk emaw pawl emaw a duh apiang tan hetah hian training theih a ni.

Vawiin meeting-ah hian BIS Deputy Director General (Eastern Region) KCS Bisht leh a thawhpui te bakah FCS&CA, PWD, P&E, PHE, H&FW, Commerce & Industries, Legal Metrology, Consumer Union, Mizoram Industries Association leh Koinonia Water Plant aiawhte an tel a ni.