Vawiin khan State Level Coordination Committee (Tobacco Control) chuan Secretariat Conference Hall-ah an Chairman, Pi L. Tochhong, Chief Secretary kaihhruaiin meeting vawi khatna an nei. He commitee in a tum ber chu Mizorama vaihlo dona kawngah chak lehzuala hmalak a nih theih dan tur leh sorkar office hrang hrangten vaihlo khuahkhirhna dan COTPA hnuaia Section hrang hrangte chak zawka an kalpui dan tur ngaihtuah a ni.
Pi L. Tochhong chuan Global Adult Tobacco Survey (GATS) 2014 -15 neih tura hmalak dan tur te ngaihtuah a tul thu a sawi a. GATS hnuhnung ber 2009 – 2010 in a tarlan danin Mizoramah mipui 67.2% vaihlo hmang an awm a. Member ten he survey neih leh turah hian tun dinhmuna Mizoram chu vaihlo hmang tam ber State a nihna atang hian hmasawnna tha tak nei tur a hma an lak a pawimawh thu leh, he mi atan hian sorkar Department hrang hrang bakah tlawmngai pawlte thawh hona tha a pawimawh thu a sawi a ni.
Pi Lal Riliani, President, Indian Society on Tobacco & Health (Mizoram Chapter) pawhin he hun hi hmanpuiin, hmasawnna hrang hrang awm chho mekte chu lawmawm a tih thu a sawi a. Hmalakna tur ptam tak la awmah huai zawk a kal turin member-te chu a sawm a. Mipuite hnenah dan bawhchhiat theihna hmuna meizu lo tura inhrilhhriat thar leh a pawimawhziate a sawi a ni.
Vawiin meeting hian vaihlo la hmang ngailo, a bik takin naupangte venhim kawngah uar leh zualin hma lak ni se tiin, vaihlo leh a kaihhnawih that loh zia an hriat chian leh zual theih nan Class hrang hrang zirlaibuah telh vek dan kawng zawn ni se a ti a. Mipuite zirtirna kawnga in tuai thar zel nan leh hmasawnna chak zawk kan neih zel theih nan September ni 11 hi ‘State Anti-Tobacco Day’ atan puang in, he ni hi kum tin hman chhoh zel ni se ti a rel a ni bawk. Chief Secretary kaihhruaina hnuaiah State Anti-Tobacco Day hman dan tur ngaihtuah turin Sub-Committee din nghal niin, kumina State Anti-Tobacco Day hmasa ber hmannaah hian District hmasawn zualte lawmpuina hun siam ni se an ti bawk a ni.
Vawiin meeting-ah hian member-te - department hrang hrang atanga hotute an tel bakah Indian Society on Tobacco & Health (Mizoram Chapter), MHIP, MZP leh MJA atangin aiawhte an tel bawk.
