Mizoram State Rural Livelihoods Mission (MzSRLM) leh Mizoram Rural Bank tangkawp chuan vawiin khan a vawikhatna atan State Level Credit Camp chu Chanmari YMA Hall-ah an buatsaih a. Rural Development Minister Pu Lalruatkima chu khuallian a ni.

Minister Pu Lalruatkima chuan kalkhawmte chu sawrkar atanga a thlawna dawn beiseina an rilru atanga paih tur leh thuawihna leh dawhtheihna nen, taima taka bei tlat turin a fuih a. Vawilehkhata sum hmuh teuh leh hlawhtlin thut tumna chuan teirei peihna a tibo a, a tawpah tlak chhiatna a thlen thin tiin kawtkaia hausak thut theihna nia lang sum peipunna tur an zawrh thinte aiin RBI hriatpui ngei bank atanga loan lak hi a himin a rintlak ber a ni, a ti.  Minister chuan MzSRLM hnuaia Self Help Group (SHG) member ten eizawnna ngelnghet an neih theih nana rahbi pawimawh tak State Level Credit Camp buatsaih a ni chu lawmawm a ti a.  SHG kaltlanga mi harsa te chawikanna programme hlawhtlinna tur chuan teirei peihna, taimakna leh pawl inlungrualna hmanga beih tlat a tul a ni, a ti. SHG nuhoten loan an lak chhan ang ngeia a hmanna tur dik taka hmang thin turin RD Minister chuan kalkhawmte a fuih a. Tam takin loan an lakin an puk a ni tih theihnghilh thakin a hmanna tur ni lovah an hmang a, chhungkaw tlakchhiatna a thlen hial thin tih sawiin loan puktuten rulh leh tur a ni tih leh awmze nei taka hman a, peipun tum tur a ni tih hre thar turin  a fuih a ni. 

Mizoram State Rural Livelihoods Mission (MzSRLM) hi kum 2013 khan Kolasib leh Serchhip District-ah bul tanin tunah chuan Siaha, Lawngtlai, Mamit leh Champhai tiamin District parukah RD Block 17 ah hmalak mek a ni. Tun dinhmunah MzSRLM hmalakna in SHG 4736 din a ni tawh a, hetah hian chhungkaw 41,260 an tel. SHG-te bul tan nan Start up cost, Community Investment fund leh Revolving fund te pek thin an ni a. Bank atangin loan lak theihna tur hawnsak niin SHG member-te tan hian tum engemawzat training buatsaih a ni. Nuho financial literacy zirtirtu tur Financial Literacy Community Resource Person  mi 121 leh Bank Facilitator mi 71 rawih an ni a. Kolasib leh Serchhip District-a bank awm lohna khaw sawmpaliah SHG te tanpuitu tur dah an ni bawk. SHG te tan hian bank an tangkai hle a, MzSRLM hian bank pathum - State Bank of India, Mizoram Rural Bank leh Apex Bank te nen inremna thuthlung an ziak tawh a ni. Vawiin hian SHG 214 hnenah bank loan Rs.2,61,70,000 pek chhuah a ni a. Heng loan te hi term loan leh cash credit limit niin Self Help Group nuho ten eizawnna ngelnghet an neih theihna tura pek an ni.

Programme hi MzSRLM Chief Executive Officer Pi H.Lalchhandami’n a kaihruai a. RBI General Manager Pi Mary Deng leh MRB Senior Manager Pu Lalduhawma ten thu an sawi a. MzSRLM Chief Operating Officer Pi Esther Lalhlimpuii’n lawmthu sawiin hun hnung a khar a ni.  Programme-ah hian District paruka block 15 atangin West Phaileng leh Bungtlang South tihloh SHG aiawh member-te an kal kim vek a ni.