Vawiin khan DC Conference Hall, Mamit-ah Sawrkar laipui Scheme, Pradhan Mantri Shram Yogi Maandhan (PM-SYM) Pension Sheme thar chu hawn a ni.

He hunah hian Dr Lalrozama, IAS District Bawrhsap chuan Committee member kal zawng zawngte chungah lawmthu a sawi a, Central Scheme thar tha tak mai chu Mamit District te tana tangkai taka hmang turin leh midangte hrilhhretu ni theuh turin kalkhawmte a chah a ni.

PM-SYM Scheme hi India rama Insuarance Scheme Company lian ber leh Ministry of Labour and Employment tangkawpa buatsaih a nih avangin a rintlak hle a, kum 10 tlin hma-a  rokhawlhna avanga  he scheme titawp duhte tan bank-a pawisa lo khawlsa leh Bank interest- a apungte lakchhuah theih a ni a.  kum 10 an dah tlin hnu, kum 60 la tlin hma sia an ti tawp duh a nih chuan  an pawisa tlingkawm zawng zawng leh a pung leh Sawrkarin a do letna nen an la chhuak thei dawn bawk a ni. Sorkar laipuiin India khua leh tui diktak kum 18 atanga 40 inkar, kut hnathawk, hna mumal leh hlawh mumal neilo te tan he Pension Scheme thar hi a duan a ni a, India ram pumah kalpui chhoh a nih dawn avangin Mizoramah pawh he scheme hi kalpui a ni dawn a ni.  PM-SYM ah hian Mahni kumzat ang zela Bank Account kaltlangin pawisa dah tur a ni.

He Scheme in a tum ber chu thlakhata Rs 15, 000/- hlawh tlinglo, nitin kuthnathawkte, khawlai sumdawngte, eichawp dawr neite, loneitute, insaknaa inhlawhfate, puan thuite, dawr nghaka inhlawhte, Mistiri leh Taxi Driver te tana buatsaih a ni a. Scheme a inziak lut te chuan hmathatna leh hlawkna hrang hrang Kum 60 tlin hnu-ah an dawng thei anga, he scheme a inziak lut a lo boral palh  anih pawhin nominee (nupui/pasal) te'n an dawng zui thei ang. Inziak lut duhte tan hian Aadhar Card , Bank Passbook leh phone no nen mahni khua leh venga Common Service Centre (CSC)  ah in register theih a ni a, hrechiang duhtan pawh engtik lai pawhin zawhfiah theih reng an ni ang.