Vawiin chawhma khan SAMETI Training Hall, Aizawl ah ICAR Research Complex for NEH Region, Mizoram centre, Kolasib, ICAR Indian Institute of Maize Research, PAU Campus, Ludhiana, Punjab leh Directorate of Agriculture (Research & Extension), Government of Mizoram, Aizawl tangkawp buatsaih ‘National Workshop on Scientific Maize Cultivation in North East’ neih a ni a, Pu C Lalrinsanga, Agriculture Minister chu Khuallian niin Workshop hawnna hun a hmang.

Agriculture Minister Pu C Lalrinsanga chuan,”Mizoram leilung leh sik leh sa in a zir avangte in hmanlai ata tawh atang khan Vaimim hi kan ching nasa in kan ei nasa hle a, kan ram a Vaimim kan hriat larte chu Mimpui, Mimban leh Puakzo te niin hengte bakah hian Vaimim chi tha kan neihte hi zirchianna neih a tul hle a ni,” a ti a,”  Vaimim hi kan ei atan a that mai bakah ran tan chaw tha em em mai anih bawk avangin Vaimim a kan intodelh hi a pawimawh hle a ni” a ti bawk. Agriculture Minister chuan ICAR, Mizoram Centre, Kolasib hmalakna in Vaimim chi tha chi (high yielder RCM 75 leh RCM 76) chu Kolasib, Aizawl, Mamit leh Lunglei district a loneitute hnenah Directorate of agriculture (R &E), Govt. of Mizoram nen tangkawpa an sem chhuah tan tawh thu a sawi a, ICAR, Mizoram Centre, Kolasib hmalakna thovin kan ram chhunga kan chin than Vaimin chi eng emaw zat chu zirchianna nen turin National Bureau of Plant Genetic Resource Center (NBPGR) a thawn thlak a nih thu a tarlang bawk. Pu C Lalrinsanga chuan Vaimim chin kawnga loneituten harsatna an tawh thin hrang hrangte sawiin,” Vaimin dahthatna hmun tha kan neih loh te, zuva leh rannung eichhiat tam thin leh a hun taka a chi mamawh ang kan hmuh thin lohte hi a pawi hle a ni,” a ti a,”Kan ram ei leh bar a kan intodelhna kawngah leh hmasawnna kawnga min kaihruaitu tur hian a ram mite hi kan pawimawh hmasa ber a, vawiin worshop buatsaihah pawh hian tih takzeta hmasawn duhna thinlung nen hun in hman ka duh a, kan ram loneitute harsatna sutkianna kawngah hma la turin ka sawm che u a ni” a ti bawk. Agriculture Minister Pu C Lalrinsanga chuan Workshop hawnna hunah hian ICAR, Mizoram Centre, Kolasib atanga siam chhuah French Bean (IC 0611106) a tlangzarh a, Mizo hming “ZORIN” bean tih a phuah nghal bawk a ni. 

Dr H Saithantluanga, Director of Agriculture (R&E) chuan “,India ramah Vaimim chu chawh rualin 2.59 ton/hac thar chhuah a nih laiin Mizoram chuan 1.5 ton/hac  chauh kan thar chhuak a ni,” a ti a,”Vaimim thar chhuah a hma kan sawn leh zual nan hian kan ram neih dan a zir a Vaimim chi tha kan thlan thiam a pawimawh dawn hle a ni” a ti bawk. ‘National Workshop on Scientific Maize Cultivation in North East’ hawnnaah hian Dr N Prakash, Director, ICAR, Umiam in kal khawmte lawmna thu a sawi a, Dr SL Jat, Scientist, ICAR IIMR in Scientific Maize Cultivation buatsaih a pawimawhnate tar langin Dr I Shakuntala, Joint Director, ICAR Kolasib in lawmthu sawina hun a hmang bawk a ni. He Worshop ah hian ICAR Mizoram Centre, ICAR Manipur Centre, ICAR Umiam, ICAR IIMR, KVK Aizawl, SDAO Serchhip leh NEIDA te atangin thusawi ngaihthlak a ni a, district hrang hrang atangin DAO leh ATMA Project Director ten an telpui bawk a ni.